AQSH ma’muriyati rahbari Donald Tramp Rossiya prezidenti Vladimir Putin bilan Vladimir Zelenskiyning uchrashuvini tashkil etishga urinmoqda, chunki bu Ukrainada tinchlikka yo‘l ochadi deb hisoblaydi. Bu haqda Axios portali xabar berdi.
Portal Amerika yetakchisining nomi oshkor etilmagan yordamchilariga tayanib, Trampning Ukrainaga nisbatan “yagona qisqa muddatli maqsadi” Putin va Zelenskiy o‘rtasida yuzma-yuz muzokaralar tashkil etishdan iborat ekanligini yozadi.
“Qolgan hammasi muqaddima. Qolgan barcha harakatlar shu lahzada tinchlikka erishish uchun qaratilgan”, dedi Trampning maslahatchisi.
Manbalarning ta’kidlashicha, nafaqat AQSH davlat kotibi Marko Rubio va Oq uy egasining maxsus vakili Stiv Uitkoff, balki Trampning o‘zi ham Putin va Zelenskiyning shaxsan uchrashishini kutmoqda.
“Bitimga erishishning usuli bor: uni muhokama qilish uchun xaridor va sotuvchini bir vaqtning o‘zida bir joyga to‘plash. Biz ikkala tomon ham bitimni xohlayotganini va uning qanday ko‘rinishda bo‘lishini tushunishga harakat qilmoqdamiz”, dedi Trampning Ukraina yo‘nalishidagi muzokaralar jarayonidan xabardor bo‘lgan maslahatchilaridan biri.
Portal ma’lumotlariga ko‘ra, AQSHning Ukraina bo‘yicha “uch bosqichli rejasi” tinchlikni ta’minlash bo‘yicha qadamlarni avval Rossiya va Amerika rahbarlarining muzokaralarida, keyin esa Tramp va Zelenskiy uchrashuvida kelishib olishdan iborat. Vashingtonning fikricha, Putin va Zelenskiyning Amerika tomoni ishtirokidagi muzokaralari yakuniy bosqich bo‘lishi kerak.
Maqolada aytilishicha, AQSH razvedkasining Ukrainadagi jangovar harakatlar borishiga bergan baholari turlicha.
“Xulosalardan biri shuki, Rossiya Qurolli kuchlari oktyabrgacha Donbassni to‘liq nazorat ostiga olishi mumkin”, deb yozadi Axios.
Boshqa xulosalarga ko‘ra, harbiy harakatlar og‘ir kechadi va ularning natijasi unchalik aniq bo‘lmaydi.
Bundan tashqari, portal ma’lumotlariga ko‘ra, Tramp maslahatchilaridan biri Vashingtonning Kiyevga xavfsizlik kafolatlari AQSH qo‘shinlarini Ukrainada joylashtirishni o‘z ichiga olishi mumkinligi haqidagi savolga ijobiy javob bergan. Boshqa bir maslahatchi bu borada aniqlik yo‘qligini aytgan.
“Biz matbuot orqali muzokaralar olib bormaymiz”, deya qo‘shimcha qilgan ushbu amaldor.
Izoh (0)