Пойтахтда бўлиб ўтган «Зўравонликка қарши институционал кураш. Медиада гендер образларни яратиш» мавзусидаги халқаро конференция доирасида йирик лойиҳа амалга оширилмоқда. Конференция Президент администрацияси Ижро этувчи аппаратининг коммуникациялар ва ахборот сиёсати сектори мудири Саида Мирзиёева ташаббуси билан ўтказилди.
Тадбир Миллий масс-медиани қўллаб-қувватлаш ва ривожлантириш жамоат фонди ҳамда Аҳолишунослик соҳасидаги БМТ жамғармасининг Ўзбекистондаги ваколатхонаси (UNFPA) томонидан ташкил этилди. Тадбирда БМТнинг Женева бўлими бош директори Татяна Валова иштирок этди.
Тадбирга ташриф буюрган ҳар бир инсон залга киришдан олдин зўравонликка учраган аёлларга ҳамда нотўғри қарашлар ва эски хурофотларни енгиб, бу дунёни ўзгартиришга интилаётган қизларга бағишланган лойиҳанинг гувоҳи ва иштирокчисига айланди.
Лойиҳа муаллифи — дизайнер, пойтахтдаги Новда компаниясининг ижодий директори Аҳмад Собитов. Ғоя асосини зўравонлик қурбонларининг ёрдам сўраб қилган мурожаатлари ёзилган аудиоёзувларни визуаллаштириш ташкил этади. Ҳар бир шундай аудиоёзув машҳур анъанавий нақшлар остида (атлас, адрас, икат ва бошқалар). Дизайнернинг сўзларига кўра, бу ёзувлар зўравонлик қурбонларининг ёрдам сўраб қилган мурожаатлари акс этган видеолардан олинган.
Шунингдек, конференция зали холида (кириш қисми)да стикерлар ёпиштирилган қизларнинг фотосуратлари намойиш этилади. Уларда хотин-қизлар кўп учрайдиган бир хил хурофотлар ва хўрликлар ёзилган. Хусусан, «Бўлажак фарзандимиз ўғил бўлади. Акс ҳолда, онангникига кетасан», «Ўқийман десанг, қолиб кетасан», «Қиз болага спортнинг нима кераги бор? Идиш-товоқ ювишни билсанг, шунинг ўзи етади», «Хотиннинг ўрни ошхонада» каби иборалар шулар жумласидан.
Анжуман иштирокчилари юз йиллар давомида Марказий Осиё мамлакатларида қизларга нисбатан ишлатилган қолиплар ва ёрлиқлардан озод қилиш рамзи сифатида бу стикерларни йиртиб ташлаши керак. Аҳмад Собитовнинг ижодий лойиҳаси халқаро форум иштирокчилари ва пойтахтнинг ижодий ҳамжамиятлари орасида катта қизиқиш уйғотди.
Изоҳ (0)