Falastin hukumati yaqin kelajakda G‘azo sektorini boshqarish uchun vaqtinchalik qo‘mita tuzilishini e’lon qiladi. Bu haqda Falastin bosh vaziri Muhammad Mustafo Misr va G‘azoni bog‘lovchi Rafah chegara-o‘tkazish punktida Misr tashqi ishlar vaziri Badr Abdulati bilan o‘tkazilgan qo‘shma matbuot anjumanida ma’lum qildi.
“Tez orada G‘azo sektorini boshqarish uchun vaqtinchalik qo‘mita tuzilishini e’lon qilamiz”, dedi Mustafo, Rafah chegara-o‘tkazish punkti G‘azo aholisi uchun hayotiy muhim yo‘l bo‘lishi kerakligini ta’kidlab.
U Isroilning aholini oziq-ovqatdan mahrum qilish va majburiy ko‘chirishga qaratilgan siyosati maqbul emasligini va bu to‘xtatilishi kerakligini qayd etgan.
Bosh vazir Isroilni qamal va oziq-ovqat yetkazib berishni to‘xtatish siyosatidan voz kechishga majbur qilish uchun xalqaro hamjamiyat yanada faolroq harakat qilishi zarurligini ta’kidlagan.
Buni kechiktirishga vaqt yo‘q. Vaqtincha qo‘mita G‘azoda “uyushgan siyosiy tuzilma” yaratish o‘rniga, hokimiyat hujumlarni to‘xtatish va anklavni tiklash uchun mavjud rasmiy muassasalarni qayta tiklashga e’tibor qaratadi, dedi Muhammad Mustafo.
Bundan tashqari, Falastin bosh vaziri Misr bilan Qohirada Isroil hujumlari oqibatida vayron bo‘lgan G‘azo sektorini tiklash masalalariga bag‘ishlangan anjumanni tashkil etish bo‘yicha hamkorlik davom etayotganini ma’lum qildi.
G‘azo sektori 2023-yil oktyabr oyidan beri Isroil va HAMAS o‘rtasidagi harbiy harakatlar tufayli o‘tkir insonparvarlik inqirozi holatida. Falastin milliy ma’muriyati avvalroq mojaro tugaganidan so‘ng anklav boshqaruvini o‘z zimmasiga olishga tayyorligini ma’lum qilgan edi, biroq yangi hokimiyat tuzilmasini shakllantirish jarayoni turli siyosiy kuchlar o‘rtasida bahs-munozaralarga sabab bo‘lmoqda.
Izoh (0)