Ukraina va AQSH hukumatlari o‘rtasidagi munosabatlar amerikalik mansabdorlarning Rossiya bilan tinchlik muzokaralarini tashkillashtirish uchun Ukrainaga bosim o‘tkazish imkoniyati haqidagi turli bayonotlari tufayli keskinlashdi. Bu haqda Politico sakkiz nafar manbasiga tayanib yozmoqda.
Gazeta suhbatdoshlaridan biri qayd etishicha, AQSH Davlat departamenti ehtimoliy muloqot uchun poydevor qo‘ymoqda. Boshqa manbaga ko‘ra, tomonlar o‘rtasida muzokaralar o‘tkazish uchun hozircha muayyan hujjatlar, rejalashtirish uchun maydonlar yoki strategiyalar yo‘q.
Vashington Kiyevni qishda jangovar harakatlarda yuzaga kelishi mumkin bo‘lgan tanaffus yaqin orada muzokaralar o‘tkazish zarurligini bildirmasligiga ishontirmoqda, shu bilan birga, uni qo‘llab-quvvatlashni susaytirmaslikka va’da bermoqda. AQSH rasmiy shaxslaridan biri Politico bilan suhbatda qayd etishicha, Dnepr chap qirg‘og‘idagi hududlarni qaytarib olish Ukraina qurolli kuchlari uchun qiyin bo‘ladi, shunday ekan, ko‘p sonli odamlar qirilib ketishidan avvalroq “tinchlik muzokaralari haqida gapirishni boshlash kerak emasmi?”.
Qish — nizoni diplomatik yo‘l bilan tartibga solish imkoniyati, deb hisoblaydiganlar Jo Bayden va uning atrofidagilarni ko‘ndirganicha yo‘q, deya nashrga ma’lum qilgan amerikalik va ukrainalik mansabdorlar orasidagi manbalari.
Xususan, Moskva va Kiyev o‘rtasida muzokaralar o‘tkazish uchun harakat qilishga AQSH shtab boshliqlari birlashgan qo‘mitasi rahbari general Mark Milli da’vat etmoqda. Politico manbalari ta’kidlashicha, ba’zan Oq uy mansabdorlari omma oldida o‘zaro suhbatlardagidan farqli narsalarni gapiradi, Milliga esa “shunchaki nimani o‘ylasa, shuni gapirish ko‘proq yoqadi”.
Milli nizoning aynan shu bosqichida muzokaralarga yuzlanish haqida avval ham ko‘p bora taklif qilgan. Uning fikricha, qishda front barqarorlashadi, shu tufayli “fursatdan foydalanib qolish” mumkin bo‘ladi. General qayd etishicha, “asl ma’noda harbiy g‘alabaga jangovar yo‘l bilan erishish imkoni bo‘lmasligi mumkin, shuning uchun boshqa vositalarga murojaat qilish zarur”. Pentagonda taxmin qilishlaricha, Ukrainadagi hujum operatsiyalari qish kelishi bilan qiyinlashib qoladi. Milli Kiyev qishgacha kutilayotgan narsalarga erishib bo‘lganini, endi muzokaralar orqali bu muvaffaqiyatlarni mustahkamlash kerakligini aytmoqda. Ammo Millining yondashuvini Bayden va AQSH prezidenti ma’muriyatining boshqa mansabdorlari qo‘llab-quvvatlamagan.
Kiyev ham Millining tashabbusini yoqlamadi. U bilan telefon suhbatida Ukraina qurolli kuchlari bosh qo‘mondoni Valeriy Zalujniy Ukraina harbiylari Rossiya bosib olingan hududlarning barchasini tark etmaguniga qadar kuchlari yetganicha jang qilishini, shundan keyingina muzokaralar o‘tkazish mumkin bo‘lishini aytgandi.
Mavzuga doir:
Izoh (0)