Toshkentda 100 MVt quvvatli elektr energiyasini saqlash tizimi quriladi

O‘zbekistonda qayta tiklanuvchi energiya manbalarini rivojlantirish sohasida muhim shartnomalar imzolandi. Bu haqda Energetika vazirligi matbuot xizmati xabar berdi.

Ma’lum qilinishicha, bular Wind and Solarshine for Electricity Distribution Panels Manufacturing MCHJ va China Energy International Group o‘rtasida “yashil” energetikani rivojlantirish va mamlakat energetika infratuzilmasini modernizatsiya qilishga qaratilgan uchta shartnoma bo‘lib, 24-iyul kuni imzolandi.

• Birinchisi — Buxoro viloyatining Peshku tumanidagi 500 MVt quvvatli shamol elektr stansiyasi loyihasi bo‘yicha konsultatsiya ko‘rsatish bitimi. Loyiha mintaqadagi eng yirik loyihalardan biri bo‘lib, yuz minglab xonadonlarni toza energiya bilan ta’minlashga xizmat qilmoqda.
• Ikkinchisi — Toshkent shahrida 100 MVt quvvatli elektr energiyasini saqlash tizimi loyihasi bo‘yicha konsultatsiya ko‘rsatish bitimi.
• Uchinchisi — qurilish ishlarini bajarish uchun EPC shartnomasi.

Bu loyihalar, Energetika vazirligiga ko‘ra, O‘zbekistonning barqaror rivojlanish maqsadlariga erishish va kam uglerodli iqtisodiyotga o‘tish milliy dasturining bir qismi hisoblanadi.

Elektr energiyasini saqlash tizimi bu elektr energiyasini vaqtinchalik saqlash va keyinchalik foydalanish uchun zaxira qilish imkonini beruvchi texnologiyalarning majmuidir. O‘zbekistonda ilk bor Andijon va Farg‘onada 300 megavattli yirik energiya saqlash tizimi barpo etilgan.