AQSH ma’muriyatida Moskva va Kiyev o‘rtasidagi muzokaralar borasida ziddiyatlar yuzaga keldi — NYT

AQSHda mansabdor shaxslar orasida Rossiya bilan yarashuv bitimini tuzishi uchun Ukrainaga bosim o‘tkazish masalasida ziddiyatlar mavjud, deb yozadi The New York Times o‘z manbalariga tayanib.

Nashr ma’lumotlariga ko‘ra, AQSH shtab boshliqlari birlashgan qo‘mitasi rahbari general Mark Milli Kiyev qishga qadar erishishi kutilgan narsalarni qo‘lga kiritganini, shuning uchun endi bu muvaffaqiyatlarni diplomatik yo‘l bilan mustahkamlashi kerakligini aytmoqda. NYT suhbatdoshlari aniqlik kiritishicha, general “Moskvaga sovg‘a” berishga da’vat etayotgani yo‘q: uning taklifining mohiyati siyosiy yechim ustida ish boshlashdan iborat, chunki vaziyatni harbiy yo‘l bilan hal qilishga yaqin kelajakda erishib bo‘lmasligi mumkin.

Qolgan amaldorlar Millining xulosalariga qo‘shilmadi, ular jangovar harakatlarda tanaffus qilish Rossiyaga o‘z qo‘shinlarini qayta tuzish imkoniyatini berishini, tomonlardan hech biri esa muzokaralarga tayyor emasligini aytmoqda. Nizo oxir-oqibat aynan muloqot orqali tartibga solinishiga ishonch bor, lekin uning mavridi kelgani yo‘q, AQSH esa Ukrainaga bosim o‘tkazmasligi kerak, degan fikrda boshqa mansabdorlar.

AQSH prezidenti Jo Bayden va uning milliy xavfsizlik bo‘yicha maslahatchisi Jeyk Sallivan ham shunday fikrda bo‘lib, ular Rossiya prezidenti Vladimir Putin hozircha muloqotga shayligini namoyish qilgani yo‘q, ukrainlar esa jang maydonida vaziyatning o‘zgarishidan ruhlandi, deb yozadi NYT.

Agar AQSH nizoning hozirgi bosqichida muzokaralarni talab qilsa, bu Putinga signal yuborib, Amerika hukumati ishni uning o‘rniga bitirib berishi uchun jangovar harakatlarni biroz cho‘zish kerak, degan fikrni uyg‘otadi, deya NYT manbalari Sallivanning pozitsiyasini bayon qildi.

Avvalroq Ukraina prezidenti Vladimir Zelenskiy o‘zi uchun Rossiya bilan yarashuv muzokaralari imkoniyatini istisno qilmayotganini bildirgandi. U 8-noyabr kuni Rossiya bilan muloqot boshlash uchun Ukrainaning shartlarini ma’lum qilgandi. Ular esa Rossiyaga qo‘shib olingan hududlar qaytarilgan holda Ukraina hududiy yaxlitligining qayta tiklanishi, BMTga hurmat, barcha zararlarning qoplanishi, har bitta harbiy jinoyatchining jazolanishi va bu boshqa hech qachon takrorlanmasligining kafolatlanishidan iborat edi.

Keyinroq Zelenskiyning Rossiya bilan muzokaralar uchun shartlari haqidagi bayonoti AQSHning “yengilgina turtkisi” bilan bog‘liq bo‘lgani haqida xabar berildi.

Noyabr boshrog‘ida Amerikaning The Washington Post gazetasi AQSH prezidenti ma’muriyati Ukraina hukumatiga murojaat qilib, Ukrainani qo‘llab-quvvatlayotgan mamlakatlar aholisini xavotirga solmaslik uchun Kiyev Moskva bilan muzokaralarga tayyorligini ommaga namoyish qilishni so‘ragani haqida xabar bergandi.