Украина ва АҚШ ҳукуматлари ўртасидаги муносабатлар америкалик мансабдорларнинг Россия билан тинчлик музокараларини ташкиллаштириш учун Украинага босим ўтказиш имконияти ҳақидаги турли баёнотлари туфайли кескинлашди. Бу ҳақда Politico саккиз нафар манбасига таяниб ёзмоқда.
Газета суҳбатдошларидан бири қайд этишича, АҚШ Давлат департаменти эҳтимолий мулоқот учун пойдевор қўймоқда. Бошқа манбага кўра, томонлар ўртасида музокаралар ўтказиш учун ҳозирча муайян ҳужжатлар, режалаштириш учун майдонлар ёки стратегиялар йўқ.
Вашингтон Киевни қишда жанговар ҳаракатларда юзага келиши мумкин бўлган танаффус яқин орада музокаралар ўтказиш зарурлигини билдирмаслигига ишонтирмоқда, шу билан бирга, уни қўллаб-қувватлашни сусайтирмасликка ваъда бермоқда. АҚШ расмий шахсларидан бири Politico билан суҳбатда қайд этишича, Днепр чап қирғоғидаги ҳудудларни қайтариб олиш Украина қуролли кучлари учун қийин бўлади, шундай экан, кўп сонли одамлар қирилиб кетишидан аввалроқ «тинчлик музокаралари ҳақида гапиришни бошлаш керак эмасми?».
Қиш — низони дипломатик йўл билан тартибга солиш имконияти, деб ҳисоблайдиганлар Жо Байден ва унинг атрофидагиларни кўндирганича йўқ, дея нашрга маълум қилган америкалик ва украиналик мансабдорлар орасидаги манбалари.
Хусусан, Москва ва Киев ўртасида музокаралар ўтказиш учун ҳаракат қилишга АҚШ штаб бошлиқлари бирлашган қўмитаси раҳбари генерал Марк Милли даъват этмоқда. Politico манбалари таъкидлашича, баъзан Оқ уй мансабдорлари омма олдида ўзаро суҳбатлардагидан фарқли нарсаларни гапиради, Миллига эса «шунчаки нимани ўйласа, шуни гапириш кўпроқ ёқади».
Милли низонинг айнан шу босқичида музокараларга юзланиш ҳақида аввал ҳам кўп бора таклиф қилган. Унинг фикрича, қишда фронт барқарорлашади, шу туфайли «фурсатдан фойдаланиб қолиш» мумкин бўлади. Генерал қайд этишича, «асл маънода ҳарбий ғалабага жанговар йўл билан эришиш имкони бўлмаслиги мумкин, шунинг учун бошқа воситаларга мурожаат қилиш зарур». Пентагонда тахмин қилишларича, Украинадаги ҳужум операциялари қиш келиши билан қийинлашиб қолади. Милли Киев қишгача кутилаётган нарсаларга эришиб бўлганини, энди музокаралар орқали бу муваффақиятларни мустаҳкамлаш кераклигини айтмоқда. Аммо Миллининг ёндашувини Байден ва АҚШ президенти маъмуриятининг бошқа мансабдорлари қўллаб-қувватламаган.
Киев ҳам Миллининг ташаббусини ёқламади. У билан телефон суҳбатида Украина қуролли кучлари бош қўмондони Валерий Залужний Украина ҳарбийлари Россия босиб олинган ҳудудларнинг барчасини тарк этмагунига қадар кучлари етганича жанг қилишини, шундан кейингина музокаралар ўтказиш мумкин бўлишини айтганди.
Мавзуга доир:
Изоҳ (0)