Toshkent va Farg‘ona viloyatlarida kriminogen vaziyati og‘ir mahallalar uchun ichki ishlar organlari profilaktika sohasida ko‘p yillik amaliy tajriba va samarali natijalarga ega pensionerlar shartnoma asosida huquqbuzarliklar profilaktikasi faoliyatiga jalb qilinadi. Hukumat qarori bilan buning tartibi tasdiqlandi.
Unga ko‘ra, pensionerlar shartnoma asosida huquqbuzarliklar profilaktikasi faoliyatiga ixtiyoriy tartibda, ichki ishlar organlari tomonidan tanlov asosida jalb qilinadi. Tanlovda ishtirok etadigan pensionerlarning soni cheklanmaydi.
Huquqbuzarliklar profilaktikasi faoliyatiga jalb qilish bo‘yicha tanlovni o‘tkazish vaqtida pensionerlarga jinsi, yoshi, irqi, millati, tili, ijtimoiy kelib chiqishi, qarindoshlarida sudlanganlikning mavjudligi, mulkiy holati va mansab mavqeyi, yashash joyi, dinga bo‘lgan munosabati, e’tiqodi, jamoat birlashmalariga mansubligi, shuningdek ularning ishchanlik sifatlari va mehnati natijalari bilan bog‘liq bo‘lmagan boshqa jihatlariga qarab mehnat va mashg‘ulotlar sohasida biror-bir to‘g‘ridan to‘g‘ri yoki bilvosita cheklovlar belgilash, xuddi shuningdek imtiyozlar berish kamsitish deb hisoblanadi va bunga yo‘l qo‘yilmaydi.
Pensionerlarni huquqbuzarliklar profilaktikasi faoliyatiga jalb qilish chog‘ida tanlov Toshkent viloyati ichki ishlar bosh boshqarmasi va Farg‘ona viloyati ichki ishlar boshqarmasi rahbari tomonidan tasdiqlangan kriminogen vaziyati og‘ir mahallalarning ro‘yxatidan kelib chiqqan holda yilda kamida bir marta o‘tkazilishi mumkin.
Bunda:
- kriminogen vaziyati og‘ir mahallalar ro‘yxatini shakllantirish hududiy profilaktika bo‘linmalari rahbarlarining asoslantirilgan ma’lumotlarga ko‘ra Huquqbuzarliklar profilaktikasi boshqarmalari tomonidan amalga oshiriladi;
- har yil boshida tasdiqlangan kriminogen vaziyati og‘ir mahallalarning ro‘yxatidan kelib chiqqan holda huquqbuzarliklar profilaktikasi faoliyatiga jalb qilinishi lozim bo‘lgan pensionerlar soniga aniqlik kiritiladi;
- pensionerlarni shartnoma asosida huquqbuzarliklar profilaktikasi faoliyatiga jalb qilish uchun tuziladigan shartnomalarning amal qilish muddati keyingi yil boshida kriminogen vaziyati og‘ir mahallalarning ro‘yxati tasdiqlanguniga qadar amal qiladi.
Pensionerlar tanlov komissiyasiga ariza bilan yozma yoki elektron shaklda murojaat qiladi. Tanlov komissiyasi tomonidan pensionerning arizasi kelib tushgan kundan e’tiboran besh ish kuni ichida unda ko‘rsatilgan ma’lumotlar o‘rganib chiqiladi. Pensionerning huquqbuzarliklar profilaktikasi faoliyatiga jalb qilishga doir talablar va shartlarga muvofiqligini, shuningdek uning ish tajribasi va kasbiy kompetensiyasini aniqlash uchun tanlov komissiyasi tomonidan suhbat o‘tkaziladi.
Suhbat natijalari quyidagi mezonlarga asosan 5 ballik tizimda baholanadi:
- berilgan savollarga to‘liq va aniq javob berishi, faoliyat sohasi bilan bog‘liq tizimli bilimlarga ega bo‘lishi, ulardan o‘z kasb faoliyatida mustaqil foydalanishni bilishi – 5 ball;
- berilgan savollarga aniq, biroq to‘liq javob berolmasligi, faoliyat sohasi bilan bog‘liq bilimlarga ega bo‘lishi, ulardan o‘z kasb faoliyatida foydalanishni bilishi – 4 ball;
- berilgan savollarga to‘liq javob berolmasligi, faoliyat sohasi bilan bog‘liq bilimlarga yetarli darajada ega bo‘lishi, ulardan o‘z kasb faoliyatida foydalanishni bilishi – 3 ball;
- berilgan savollarga noaniq javob berishi, faoliyat sohasi bilan bog‘liq bilimlarga ega bo‘lishi, ulardan o‘z kasb faoliyatida foydalanishni bilmasligi – 2 ball;
- berilgan savollarga noaniq javob berishi, faoliyat sohasi bilan bog‘liq bilimlarga yetarli darajada ega emasligi – 1 ball;
- berilgan savollarga umuman javob bera olmasligi – 0 ball.
Tanlov natijasiga ko‘ra eng yuqori ball to‘plagan pensionerlar huquqbuzarliklar profilaktikasi faoliyatiga jalb qilinadi.
Shartnoma asosida huquqbuzarliklar profilaktikasi faoliyatiga jalb qilingan pensionerlarga haq to‘lash taqdim etilgan dalolatnomalarga asosan ularga to‘lanayotgan pensiyasining 100 foizi miqdorda Huquqbuzarliklar profilaktikasi xizmatining huquqbuzarliklar profilaktikasi tizimini rivojlantirish jamg‘armalari mablag‘lari hisobidan amalga oshiriladi.
Izoh (0)