Rossiya prezidenti Vladimir Putin Checheniston rahbari Ramzan Qodirovning rafiqasini “Qahramon ona” unvoni bilan taqdirladi. Rossiya huquqiy axborot portalida tegishli hujjat e’lon qilindi.
“Oila institutini mustahkamlash va bolalar tarbiyasidagi ulkan xizmatlari uchun Qodirova Medni Musayevnaga ‘Qahramon ona’ unvoni berilsin”, deyiladi hujjatda.
15-avgust kuni Vladimir Putin Rossiyada 10 va undan ortiq bolani dunyoga keltirib, voyaga yetkazgan ayollarga “Qahramon ona” unvonini berish to‘g‘risidagi farmonni imzolagandi. Hujjatda ushbu mukofot egalariga bir million rubl miqdorida bir martalik rag‘batlantirish to‘lanishi ko‘rsatilgan. Ramzan Qodirov va rafiqasining 14 nafar farzandi bor.
Putin oktabr oyida Ramzan Qodirovning onasi Aymani Qodirovani “Shon-sharaf” ordeni bilan taqdirlagandi. Hujjatda Checheniston rahbarining onasi faol ijtimoiy faoliyati uchun taqdirlangani keltirib o‘tilgan.
Bungacha Ramzan Qodirov Rossiya prezidenti Vladimir Putindan Rossiya gvardiyasi general-polkovnigi unvonini olgandi. Shu bilan birga, Checheniston rahbari “Stomatologiya sohasidagi xizmatlari uchun” ordeni bilan mukofotlangandi.
Izoh (0)