Venesuela shimolidagi Las-Texerias shahrida kuchli yomg‘irlar oqibatida kamida 36 kishi halok bo‘ldi, 56 kishi bedarak yo‘qoldi, deb xabar bermoqda Ispaniyaning RTVE telekanali.
Kuchli yog‘ingarchilik tufayli daryolarda suv sathi ko‘tarilib, ko‘chki va toshqinlarni keltirib chiqargan. RTVE ta’kidlashicha, suv oqimi uylar va ko‘cha jihozlarini yuvib, yo‘lidagi barcha narsalarni vayron qilgan. Ekinlarga zarar yetgan, suv ta’minoti uzilgan.
Venesuela prezidenti Nikolas Maduro Twitter’dagi sahifasida hukumat odamlarga “har tomonlama g‘amxo‘rlik qilish” uchun qutqaruvchilar, fuqarolik xavfsizligi, texnik xizmat ko‘rsatish va tozalash guruhlari hamda turli muassasalar xodimlarini yuborganini aytdi. Uylaridan ayrilgan odamlar uchun vaqtinchalik yashash markazlarini ochish va’da qilinmoqda.
Mamlakatda uch kunlik motam e’lon qilingan.
Las-Texerias aholisi 50 ming kishidan iborat bo‘lib, shaharda 317 ta uy butunlay vayron bo‘lgan, yana 750 tasi jiddiy zarar ko‘rgan.
Oxirgi ikki hafta ichida Venesuelada jami 42 kishi kuchli yomg‘irlar tufayli halok bo‘ldi, deb ta’kidladi RTVE.
Izoh (0)