Ukraina Kursk atom elektr stansiyasi va “Turk oqimi” gaz quvuridagi teraktlarga aloqador emas, dedi mamlakat prezidenti ofisi rahbarining maslahatchisi Mixail Podolyak. Rossiya prezidenti Vladimir Putin Ukrainani ushbu inshootlarga hujumda ayblagan edi.
“Albatta, men fantastik kitoblar o‘qib turish tarafdoriman, lekin fikrimcha, Putin aytayotgan gaplarning hammasi qandaydir g‘alati tusga ega”, — dedi Podolyak.
Uning so‘zlariga ko‘ra, Putindan boshqa hech kim Kursk AES yoki “Turk oqimi”dagi teraktlar haqida eshitmagan.
“Bir kishi chiqadi va dalil-isbotsiz nimadir deydi. Hech qanday “Turk oqimlari” ham, Kursk AES ham bo‘lmagan. Bular mutlaqo ertak, Putinning bobosi aytgan ertaklar, u ulardan o‘z harakatlarini oqlash uchun foydalanmoqda”, — dedi Podolyak.
Rossiya rasmiylari Qrim ko‘prigidagi portlashda ham Ukrainani ayblagan. Podolyakning so‘zlariga ko‘ra, Ukraina shaharlari markazlari va tinch aholi klasterlariga qilingan hujumlar bilan solishtirganda Qrim ko‘prigiga qilingan hujumni terakt deb atash yanada g‘alati.
Izoh (0)