BMT Bosh assambleyasi Donbass, Xarkov va Zaporojye viloyatlaridagi referendumlarni qoralovchi rezolyutsiya loyihasi bo‘yicha ochiq ovoz berish o‘tkazishni ma’qulladi, deb yozadi “RBK”.
Bunday taklif bilan Albaniya diplomatlari chiqdi, 107 ta davlat tashabbusni qo‘llab-quvvatladi, 13 tasi qarshi chiqdi, yana 39 tasi betaraf qoldi.
Avvalroq Rossiya ovoz berishni yashirincha o‘tkazishni taklif qilgandi, bunday tashabbus bilan mamlakatning tashkilotdagi doimiy vakili Vasiliy Nebenzya chiqqan . BMT Bosh assambleyasida ovoz berishni ochiqcha o‘tkazishda qaror qilishgach, u Rossiya tomonidan qat’iy norozilikni bildirdi.
Nebenzya “ablahona firibgarlik” yuz berganini, unda Bosh assambleya vakili Chaba Kyoryoshi qatnashganini aytdi. Rossiya vakillariga navbat bo‘yicha so‘z berilmadi, diplomatlarning nutqlari noto‘g‘ri talqin qilindi. Natijada Rossiya delegatsiyasi ovoz berishda qatnashmaslikka qaror qildi, dedi Nebenzya.
“BMTga a’zo mamlakatlardan o‘z fikrini erkin ifodalash huquqini tortib olishga urinishmoqda”, — dedi u.
Rossiya doimiy vakilining fikricha, BMT tarixida “bunday ko‘lamda surbetlik, ziddiyatlar va hozirgidek o‘ta xavfli qutblashuv bo‘lmagan”.
Nebenzya BMT mamlakatlarini ushbu hududlarda o‘tkazilgan referendumlar natijalarini hurmat qilishga chaqirdi. AQSH diplomatlari esa xalqaro hamjamiyatni Rossiya prezidenti Vladimir Putinning xatti-harakatlarini qabul qilmasliklarini namoyish qilishga da’vat etdi.
23—27-sentabr kunlari Zaporojye viloyatida, LXR, DXR va Xerson viloyatlarida bo‘lgani kabi, Rossiya tarkibiga kirish haqida referendum bo‘lib o‘tdi. 30-sentabr kuni Kremlda hududlarning qo‘shilishi to‘g‘risidagi shartnomalarni imzolash marosimi o‘tkazildi. 2-oktabr kuni ular, tartib bo‘yicha, Konstitutsiyaviy sud tomonidan ma’qullandi. 3 va 4-oktabr kunlari shartnomalarni hamda qo‘shilish haqidagi federal konstitutsiyaviy qonunlarni Davlat dumasi va Federatsiya kengashi qo‘llab-quvvatladi. 5-oktabr kuni esa prezident imzosi qo‘yilgan shartnomalarni Kreml e’lon qildi.
BMT bosh kotibi DXR, LXR hamda Xerson va Zaporojye viloyatlarining Rossiya qo‘shinlari nazorati ostidagi qismlari Rossiya tarkibiga kirishi yuridik kuchga ega bo‘lmasligini aytgandi.
Izoh (0)