Ukrainaning butun hududi bo‘ylab havo trevogasi e’lon qilindi

11-oktabr kuni ertalab Ukrainaning Vinnitsa viloyatidagi Ladijin issiqlik elektr stansiyasiga ikkita Shahed-136 kamikadze-dronlari hujum qildi, bu haqda viloyat ma’muriyati rahbari Sergey Borzov ma’lum qildi.

“Janub” havo qo‘mondonligi xabariga ko‘ra, 11-oktabrga o‘tar kechasi Nikolayev viloyatida beshta, Odessa viloyatida esa uchta Shahed-136 dronlari havo hujumiga qarshi mudofaa tizimi tomonidan yo‘q qilingan.

11-oktabr kuni ertalab Ukrainaning aksariyat viloyatlarida yana havo trevogasi e’lon qilindi. Keyinroq esa butun Ukraina hududi bo‘ylab havo trevogasi haqida xabar berildi.

Ukraina shaharlariga hujum

Rossiya prezidenti Vladimir Putin 10-oktabr kuni ertalab Ukraina shaharlarining o‘qqa tutilishi Kerch bo‘g‘ozidagi Qrim ko‘prigida sodir bo‘lgan portlashga javob bo‘lganini aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.

Ukraina prezidenti Vladimir Zelenskiy Rossiya qo‘shinlari bir kunda Ukraina shaharlariga qarata 84 ta raketa uchirganini ma’lum qildi, shularning 43 tasi havo hujumiga qarshi mudofaa tizimi tomonidan urib tushirilgan. Bundan tashqari, shu kuni Ukrainaga 24 ta uchuvchisiz uchar qurilma hujum qilgan, 13 tasi urib tushirilgan.

Ukraina favqulodda vaziyatlar davlat xizmati bergan so‘nggi ma’lumotlarga ko‘ra, 11-oktabr kuni ertalab holatiga Rossiya hujumidan keyin Kiyev, Lvov, Sumi, Ternopol va Xmelnitskiy viloyatlarida 300 ta aholi punkti elektr ta’minotisiz qilmoqda. 3500 dan ortiq shahar va qishloqlarda elektr ta’minoti allaqachon tiklangan. 19 kishi halok bo‘lib, yana 105 kishi jarohatlar olgan.