Britaniya bosh vaziri Liz Trass Rossiyaning Ukrainaga raketa hujumlari tufayli NATO yetakchilarini shoshilinch yig‘ilishga chaqirmoqchi. Britaniya hukumati rahbari bugun, 11-oktabr kuni onlayn formatda bo‘lib o‘tadigan G7 sammitida tegishli murojaat bilan chiqadi.
“Hech kim tinchlikni Ukrainadan ko‘proq xohlamaydi. O‘z navbatida, biz ularga g‘alaba qozonishda yordam berishga bo‘lgan qat’iyatimizni zarracha sustlashtirmasligimiz kerak”, — deya Trass xonimning so‘zlaridan iqtibos keltirdi Reuters. Shuningdek, u ittifoqchilardan Rossiyaga qarshi sanksiyalar siyosatini davom ettirishni so‘ramoqchi.
Qayd etilishicha, bugungi sammitda “Katta yettilik” davlatlari energiya xavfsizligi masalasini ham muhokama qiladi.
10-oktabr kuni Rossiya Ukraina bo‘ylab ayovsiz raketa zarbalarini berdi. Ukraina shaharlariga 80 dan ortiq raketa tashlangan, ularning yarmi havo hujumidan mudofaa tizimlari tomonidan urib tushirilgan. Ukraina rasmiylarining xabar berishicha, Kiyevning o‘qqa tutilishi oqibatida kamida sakkiz nafar tinch aholi halok bo‘lgan.
Rossiya prezidenti Vladimir Putinning aytishicha, Ukraina shaharlarining o‘qqa tutilishi Kerch bo‘g‘ozidagi Qrim ko‘prigida sodir bo‘lgan portlashga javob edi.
Izoh (0)