Polsha bog‘dorchilik uyushmasi bir qator xorijiy davlatlar fuqarolarini ishga olishni soddalashtirishga intilmoqda. Bu haqda EastFruit xabar bermoqda.
Fermerlarning aytishicha, bu yil ishchilar yetishmay qoladi. Shu sababli, soha tashkiloti hukumatdan ish bilan ta’minlash usullarini o‘zgartirishni va migrantlar uchun bir qator to‘siqlarni olib tashlashni so‘radi.
Xususan, O‘zbekiston, Hindiston va Nepal kabi davlatlar fuqarolari uchun mehnat bozori testlarini bekor qilish taklif etildi. Hozirda mahalliy bo‘sh ish o‘rinlarini mahalliy kadrlar bilan to‘ldirishning iloji yo‘qligi tekshirilmoqda.
Biroq bog‘bonlar uyushmasining talabi qanoatlantirilmadi. Polsha Oila va ijtimoiy siyosat vazirligi fuqarolari uchun soddalashtirilgan ishga qabul qilish tartibi amal qiladigan davlatlar ro‘yxatiga qo‘shimchalar kiritish masalasini hali ko‘rib chiqmaganligini ma’lum qildi.
Shu bilan birga, boshqarma Ichki ishlar vazirligi bilan birgalikda soddalashtirilgan bandlikni yangi mamlakatlarga kengaytirish imkoniyatlarini o‘rganmoqda. Bundan tashqari, xorijliklarni ishga yollash bo‘yicha yangi qonun loyihasi ustida ish olib borilmoqda.
Xabarda aytilishicha, qonun loyihasida migrantlar uchun bir vaqtning o‘zida bir nechta yengilliklar nazarda tutilgan. Mehnat bozori testini bekor qilishdan tashqari, ehtimol bu ish jarayonini raqamlashtirish va ishlashga ruxsat berish shartlarini aniqlashtirishni o‘z ichiga oladi.
Bungacha o‘zbekistonliklar va Markaziy Osiyoning boshqa mamlakatlari aholisining Polshada ishlashga qiziqishi ortib borayotgan edi. Rasmiy ma’lumotlarga ko‘ra, mart oyi oxirida O‘zbekistonning 2,8 ming fuqarosi mahalliy ijtimoiy sug‘urta fondida ro‘yxatga olingan.
Izoh (0)