Toshkentda 45,3 foiz o‘sish, Buxoroda 10,7 foiz qisqarish: Avgustda O‘zbekistonning tovar eksporti qanday o‘zgardi?

Iqtisodiy tadqiqotlar va islohotlar markazi avgust oyidagi ishbilarmonlik faoliyatini tahlil qildi. Bu haqda Markaz matbuot xizmati “Daryo”ga ma’lum qildi.

Tovar eksporti

Davlat bojxona qo‘mitasi ma’lumotlariga ko‘ra, yil boshidan 31-avgustga qadar tovarlar eksporti hajmi o‘tgan yilning mos davriga nisbatan 23 foizga oshgan.

Tovarlar eksport hajmining sezilarli o‘sishi Samarqand (35,9 foiz), Qashqadaryo (35,9 foiz), Andijon (35,1 foiz), Namangan (30,7 foiz), Sirdaryo (27,7 foiz) viloyatlarida va Toshkent shahrida (45,3 foiz) qayd etildi.

O‘zbekiston eksportining o‘sishi sanoat mahsulotlari, oziq-ovqat mahsulotlari, kimyo va qishloq xo‘jaligi mahsulotlari eksportining o‘sish sur’atlari bilan izohlanadi.

Tovar eksportining qisqarishi Buxoro (10,7 foiz), Surxondaryo (7,3 foiz) viloyatlarida va Qoraqalpog‘istonda (16,1 foiz) kuzatildi.

Eksport hajmining kamayishi Buxoro viloyatida paxta tolasining ichki bozorga yo‘naltirilganligi bilan izohlanadi.

Qoraqalpog‘istonda esa bu holat plastmassa va undan tayyorlangan mahsulotlar, ip-kalava va farmatsevtika mahsulotlari eksportining kamayishi bilan, Surxondaryo viloyatida meva-sabzavot mahsulotlari eksportining kamayishi bilan bog‘liq.

Avvalroq O‘zbekistonda investitsiyalar uchun eng jozibador tarmoqlar aniqlangani haqida xabar berilgandi.