AQSH muhojirlarga 300 mingta ishchi viza bermoqchi

AQSH meksikaliklar va Markaziy Amerika aholisi uchun 300 000 ishchi viza taklifini e’lon qiladi, deb yozmoqda Reuters.

Bu haqda Meksika ichki ishlar vaziri Adan Augusto Lopes ma’lum qilgan. Qo‘shma Shtatlar ushbu taklifni iyul oyida Meksika prezidenti Manuel Lopes Obrador Vashingtonga tashrif buyurganida e’lon qiladi, dedi vazir.

“AQSH hukumati bilan har kuni muzokaralar olib boryapmiz. Ular birinchi navbatda 300 mingta vaqtinchalik ishchi vizasini berishga rozi bo‘ldi, shundan 150 mingtasi meksikaliklarga yoki hozir Meksikada bo‘lib turgan va shimolga ko‘chish imkoniyatini kutayotgan xorijliklarga beriladi”, — dedi u.

Qolgan 150 mingtasi Markaziy Amerika davlatlari o‘rtasida mutanosib ravishda taqsimlanadi, dedi Lopes.

Avvalroq AQSH rasmiylari AQSH—Meksika chegarasida 1,7 million muhojirni qo‘lga olgan edi, bu mamlakat tarixidagi rekord ko‘rsatkichdir.