Turkmanistonda iste’fodagi askarlarni demobilizatsiya (uyga qaytarish) qilish ishlari davom etmoqda.
Harbiy qismni tark etishdan oldin askarlar harbiy kiyimlarini, jumladan, ichki kiyimlarini qaytarib berishi, kiyim-kechak va hojatxona vositalaridan foydalanganlik uchun 270 manat (840 ming so‘m) to‘lashi kerak, deya xabar bermoqda “Xronika Turkmanistana” muxbirlari.
Ushbu pul rasmiy ravishda harbiy xizmatni o‘tash paytida hisoblangan pul nafaqasidan ushlab qolinadi, ushbu nafaqa bajarilgan ish va unvoniga qarab oyiga 90 dan 100 manatgacha to‘lanadi. Qolgan pullar ularning bank hisob raqamiga o‘tkaziladi. Agar u yo‘q bo‘lsa, unda ota-onalarning hisobiga o‘tkazib beriladi.
Dashoguz (Toshhovuz) viloyatidagi harbiy qismda xizmat qilgan yigitning so‘zlariga ko‘ra, uyga jo‘natishdan bir hafta oldin askarlar ofitser hamrohligida bozordan fuqarolik kiyimlarini sotib olgan. Ular, shuningdek, norasmiy “an’anaga ko‘ra”, navbatchi va qo‘riqchi nazorat punktlariga kamida 200 manat (622 ming so‘m) sovg‘a qoldirishlari kerak.
Harbiy qism komandiriga beriladigan 1000 manat (uch million bir yuz o‘n ikki ming so‘m) pora evaziga ota-onalar o‘g‘lini “Harbiy xizmatga chaqirish va rezervga o‘tkazish to‘g‘risida”gi farmon ommaviy axborot vositalarida e’lon qilingan kunning ertasigayoq olib ketishi mumkin. Aks holda, askar harbiy qismda yana bir yarim — ikki oy saqlab turilishi mumkin.
O‘g‘lining armiyadan qaytishi sharafiga ko‘plab oilalar katta bayramlar uyushtiradi, ko‘plab mehmonlarni taklif qiladi va qo‘shiqchi, musiqachilar bilan kechki ovqatlar uyushtiradi. Ularning xizmatlari o‘rtacha 1400 manatni (to‘rt million uch yuz ellik yetti ming so‘m) tashkil qiladi.
Mahalliy hokimiyat idoralari COVID-19 ga qo‘yilgan barcha cheklovlar haligacha olib tashlanmagani sabab, bayramni ko‘chada yoki kafeda emas, balki uyda yoki hovlida o‘tkazishni tavsiya qilmoqda.
Turkmaniston armiyasidagi harbiy xizmat muddati ikki yil.
Izoh (0)