O‘zbekistonda 2021-yilda jangovar tayyorgarlik tekshiruvlari ikki barobar oshgan

O‘zbekistondagi harbiy bo‘linmalarning bevosita real jangovar vaziyatlarga yaqinlashtirilgan holda qo‘qqisdan jangovar tayyorgarligini tekshirish tadbirlari soni 2021-yilda o‘tgan yilgiga nisbatan ikki barobarga oshdi. Bu haqda Oliy Majlis Senati matbuot xizmati xabar berdi. Mudofaa vazirligi qo‘shinlarini doimiy jangovar shayligini ushlab turish maqsadida 1 100 dan ortiq to‘satdan tekshiruvlar real jangovar vaziyatlarga yaqinlashtirilgan sharoitda o‘tkazilgan.

O‘zbekiston Qurolli kuchlari akademiyasida Senatning Mudofaa va xavfsizlik masalalari qo‘mitasining yig‘ilishi bo‘lib o‘tdi. Unda mudofaa vazirining o‘rinbosari Hamdam Qarshiyev mamlakat Qurolli kuchlari va harbiy qurilishini rivojlantirish hamda harbiy xizmatni o‘tash va harbiy xavfsizlikni ta’minlash bo‘yicha 2021-yilning 11 oyi davomida bajarilgan vazifalar holati to‘g‘risidagi axborotini eshitilgan.

Yuqori palata ma’lumotlariga ko‘ra, harbiylarga jangovar tayyorgarlik mashg‘ulotlarini sifatli o‘tkazish hamda munosib xizmat sharoitlarini yaratish maqsadida 20 ta poligon yangidan qurilib ta’mirlangan hamda zamonaviy o‘quv-moddiy baza bilan jihozlangan. Ulardan 12 tasi xalqaro talablarga mos ravishda qurilib, harbiy musobaqalarni soha yo‘nalishlari bo‘yicha o‘tkazish hamda mutaxassislarning kasbiy tayyorgarligini oshirishga yo‘naltirilgan.

Bundan tashqari, har yili takrorlanib o‘tkaziladigan mashg‘ulotlarga chek qo‘yilib, haftaning ketma-ket 4 kuni faqat jangovar tayyorgarlikka qaratilgan hamda amaliy mashg‘ulotlar sifati va soni oshirilgan.

Hisobot davrida NATO armiyalari tajribasidan kelib chiqib, 6 ta poligonda 45 kilometr majmuaviy yo‘laklar qurilgan. Mazkur komplekslarda razvedka, maxsus va desant bo‘linmalarini barcha shaxsiy tarkibi og‘ir jismoniy va psixologik bosimli murakkab sinovdan o‘tkazilgan.

Qurolli Kuchlar akademiyasi yetakchi oliy ta’lim muassasalari tajribalarini o‘zida qamrab olgan, yangi xalqaro standartlarga mos takomillashtirilgan. Natijada akademiyaning ilmiy salohiyati 51 foizga yetkazilgan.

Shuningdek, “Temurbeklar maktabi”da ta’lim tizimi tubdan isloh qilinishi natijasida bitiruvchilarning oliy va oliy harbiy ta’lim muassasalariga o‘qishga qabul qilinishi so‘nggi 5 yilda 17 foizdan 98 foizga yetkazilgan.

Bundan tashqari, Mudofaa vazirligining 300 ga yaqin harbiy xizmatchilari Rossiya, AQSh, Turkiya, Germaniya, Xitoy, Pokiston, Hindiston, Belarus, Italiya, Buyuk Britaniya, Janubiy Koreya oliy harbiy ta’lim muassasalari va o‘quv markazlarida ta’lim olib kelgan, tayyorgarlikdan o‘tgan.

Eslatib o‘tamiz, shu yilning avgust oyida O‘zbekiston harbiylari Rossiya va Tojikiston bilan mashg‘ulotlarda qatnashgandi. Harbiy mashqlar “Termiz” poligonida bo‘lib o‘tgan. O‘zbekiston, Tojikiston va Rossiya Afg‘oniston bilan chegarada o‘tkazgan harbiy mashg‘ulotlarda 2,5 mingdan ortiq harbiy qatnashgan. Mashqlar paytida Rossiya va O‘zbekiston maxsus kuchlari o‘zbek-afg‘on chegarasidagi shartli terrorchilarni yakson qilgandi.