Ўзбекистондаги ҳарбий бўлинмаларнинг бевосита реал жанговар вазиятларга яқинлаштирилган ҳолда қўққисдан жанговар тайёргарлигини текшириш тадбирлари сони 2021 йилда ўтган йилгига нисбатан икки баробарга ошди. Бу ҳақда Олий Мажлис Сенати матбуот хизмати хабар берди. Мудофаа вазирлиги қўшинларини доимий жанговар шайлигини ушлаб туриш мақсадида 1 100 дан ортиқ тўсатдан текширувлар реал жанговар вазиятларга яқинлаштирилган шароитда ўтказилган.
Ўзбекистон Қуролли кучлари академиясида Сенатнинг Мудофаа ва хавфсизлик масалалари қўмитасининг йиғилиши бўлиб ўтди. Унда мудофаа вазирининг ўринбосари Ҳамдам Қаршиев мамлакат Қуролли кучлари ва ҳарбий қурилишини ривожлантириш ҳамда ҳарбий хизматни ўташ ва ҳарбий хавфсизликни таъминлаш бўйича 2021 йилнинг 11 ойи давомида бажарилган вазифалар ҳолати тўғрисидаги ахборотини эшитилган.
Юқори палата маълумотларига кўра, ҳарбийларга жанговар тайёргарлик машғулотларини сифатли ўтказиш ҳамда муносиб хизмат шароитларини яратиш мақсадида 20 та полигон янгидан қурилиб таъмирланган ҳамда замонавий ўқув-моддий база билан жиҳозланган. Улардан 12 таси халқаро талабларга мос равишда қурилиб, ҳарбий мусобақаларни соҳа йўналишлари бўйича ўтказиш ҳамда мутахассисларнинг касбий тайёргарлигини оширишга йўналтирилган.
Бундан ташқари, ҳар йили такрорланиб ўтказиладиган машғулотларга чек қўйилиб, ҳафтанинг кетма-кет 4 куни фақат жанговар тайёргарликка қаратилган ҳамда амалий машғулотлар сифати ва сони оширилган.
Ҳисобот даврида НАТО армиялари тажрибасидан келиб чиқиб, 6 та полигонда 45 километр мажмуавий йўлаклар қурилган. Мазкур комплексларда разведка, махсус ва десант бўлинмаларини барча шахсий таркиби оғир жисмоний ва психологик босимли мураккаб синовдан ўтказилган.
Қуролли Кучлар академияси етакчи олий таълим муассасалари тажрибаларини ўзида қамраб олган, янги халқаро стандартларга мос такомиллаштирилган. Натижада академиянинг илмий салоҳияти 51 фоизга етказилган.
Шунингдек, «Темурбеклар мактаби»да таълим тизими тубдан ислоҳ қилиниши натижасида битирувчиларнинг олий ва олий ҳарбий таълим муассасаларига ўқишга қабул қилиниши сўнгги 5 йилда 17 фоиздан 98 фоизга етказилган.
Бундан ташқари, Мудофаа вазирлигининг 300 га яқин ҳарбий хизматчилари Россия, АҚШ, Туркия, Германия, Хитой, Покистон, Ҳиндистон, Беларусь, Италия, Буюк Британия, Жанубий Корея олий ҳарбий таълим муассасалари ва ўқув марказларида таълим олиб келган, тайёргарликдан ўтган.
Эслатиб ўтамиз, шу йилнинг август ойида Ўзбекистон ҳарбийлари Россия ва Тожикистон билан машғулотларда қатнашганди. Ҳарбий машқлар «Термиз» полигонида бўлиб ўтган. Ўзбекистон, Тожикистон ва Россия Афғонистон билан чегарада ўтказган ҳарбий машғулотларда 2,5 мингдан ортиқ ҳарбий қатнашган. Машқлар пайтида Россия ва Ўзбекистон махсус кучлари ўзбек-афғон чегарасидаги шартли террорчиларни яксон қилганди.
Мавзуга доир:
Изоҳ (0)