“O‘zbekiston temir yo‘llari” AJning “So‘g‘diyona trans” sho‘ba korxonasi Afg‘onistondan amalga oshiriladigan yuk tashuvlari hajmini, jumladan, MDH davlatlariga oshirishni rejalashtirmoqda. Bu haqda “O‘zbekiston temir yo‘llari” matbuot xizmati xabar berdi.
“So‘g‘diyona trans” 2021-yilning dekabrida Afg‘onistonda Hayraton–Mozori-Sharif temiryo‘l liniyasini ekspluatatsiya va texnik xizmat ko‘rsatish maqsadida tashkil etilgan. 2010-yilning noyabrida “O‘zbekiston temir yo‘llari” qiymati 129 million dollarga teng 75 kilometrlik liniya qurilishini yakunlagandi.
Yaqin vaqtlar ichida “So‘g‘diyona trans” O‘zbekistonga afg‘on tadbirkorlarining 99 ta vagonda, Qozog‘istonga esa 45 ta vagonda turli yuklarini tashib berishni rejalashtirilgan.
Matbuot xizmati ma’lumotlariga ko‘ra, 2021-yilda jami 32,4 ming tonna (564 vagon) yuk Afg‘onistondan eksport qilingan bo‘lib, ulardan asosan 3,6 ming tonna quruq meva, 24,3 ming tonna kartoshka, 4,2 ming tonna mandarin va 197 tonna talk mahsulotlari eksport qilishga erishilgan.
“O‘zbekiston temir yo‘llari”ning eslatishicha, “So‘g‘diyona trans” sho‘ba korxonasi tomonidan o‘tgan yil davomida Afg‘oniston va Afg‘oniston orqali boshqa davlatlarga qariyb 28 million tonna yuk yetkazib berilgan. “Bundan tashqari mazkur korxona Afg‘oniston yuklarini temiryo‘ldan O‘zbekiston orqali MDH mamlakatlari hamda Xitoyga eksport qilishga salmoqli hissa qo‘shib kelmoqda”, — deyiladi xabarda.
Eslatib o‘tamiz, 2020-yilning 20-avgust kuni Afg‘onistonning Balx viloyatida “So‘g‘diyona trans” sho‘ba korxonasi vakillariga qurolli hujum sodir etilgandi. Hujum oqibatida korxona koordinatsiya bo‘limi boshlig‘i o‘rinbosari jarohat olgan, ikki nafar Afg‘oniston fuqarosi (Ichki ishlar vazirligining temiryo‘lni qo‘riqlash batalyoni askari va bir nafar hujum qilgan noma’lum shaxs) halok bo‘lgan.
Izoh (0)