“Biri korrupsiyaga yo‘l ochadi, boshqasi darrov g‘o‘ddayib, oyog‘i yerdan uziladi”. Shavkat Mirziyoyev Toshkent viloyatining sobiq hokimlari haqida

Olmaliq shahrida faollar bilan bo‘lgan uchrashuvda Shavkat Mirziyoyev Toshkent viloyatidagi kadrlar muammosi haqida gapirdi.

“Men nima uchun hokim yordamchilari degan tizimni joriy qildim, chunki o‘zim uchun yaxshi kadrlar qidirib yuribman. Mana, bugun ham sizlar bilan suhbatda yangi kadrlar kashf qildim.

Misol uchun, Andijon viloyatida 30 yilda hokimlar soni ko‘p bo‘lmagan. Lekin Toshkent viloyatiga, majoziy ma’noda aytganda, 30 ta hokim kelib-ketdi. Nega? Chunki ishni eplaydigan yaxshi kadrlar topish qiyin. Biri korrupsiyaga yo‘l ochadi, boshqasi darrov g‘o‘ddayib, oyog‘i yerdan uziladi. Men amalni beraman, lekin arqonni uzun tashlab qo‘yaman.

Zoir Mirzayevni bekorga olib kelmadim bu yerga. Qashqadaryo ham og‘ir viloyatlardan biri edi, ammo epladi. Toshkent viloyatida muammolar ko‘pligi uchun uni atayin bu yerga olib keldim”, — dedi Shavkat Mirziyoyev.

Ma’lumot uchun, Toshkent viloyati hokimi 2021-yilning 18-noyabr kuni 16-marta o‘zgardi (O‘zbekistonning boshqa hech bir hududida hokimlar bu qadar ko‘p o‘zgarmagan) — viloyatning Chirchiq shahriga hokim qilib yuborilgan Davron Hidoyatov o‘rnini ikki yil Qashqadaryoga hokimlik qilgan Zoir Mirzayev egalladi.

Davron Hidoyatov Toshkent viloyatini bir yil ham boshqarmagan hokimlar safini to‘ldirdi. U 9 oy 19 kun hokimlik qildi — bu borada uning ko‘rsatkichi Shukrullo Boboyevnikidan ham yomon (u ham 2016—2017-yillarda 10 oy 15 kun hokimlik qilgan), lekin Sodiq Abdullayev (6 oy 8 kun) va Islomjon Ergashxo‘jayevnikidan (4 oy 3 kun) yaxshiroq. Qayd etish joiz, Toshkent viloyati hokimi 2016-yil avgustidan beri olti marta o‘zgardi.