Xitoy tovush tezligidan besh baravar tezkor ucha oladigan gipertovushli raketani uchirib ko‘rdi, deb xabar beradi Tengrinews.
Mazkur sinovlar haqida birinchi bo‘lib Financial Times gazetasi xabar bergan. Ta’kidlanishicha, sinovlar 2021-yilning iyulida Janubiy Xitoy dengizida bo‘lib o‘tgan. Taxminlarga ko‘ra, sinovdan o‘tkazilgan qurolning yakson qilinadigan nishoni bo‘lmagan va sinovlar davomida uning faqatgina imkoniyati tekshirilgan. Qayd etilishicha, dengiz ustidan uchib o‘tayotgan raketadan boshqa bir obyekt ajralgan — u uchish apparatlari uchun mo‘ljallangan “havo-havo” klassidagi boshqariluvchan raketa bo‘lishi mumkin.
Nashr ma’lumotlariga ko‘ra, AQSh Mudofaa vazirligining Mudofaa sohasidagi istiqbolli tadqiqot loyihalari agentligi Xitoy qanday qilib “fizika qonunlarini chetlab o‘tib” qurol yaratishga muvaffaq bo‘lganini tushunishga urinmoqda.
Oq uy raketaning uchirilishiga izoh berishdan bosh tortib, yana bir bor xavotirda ekanliklarini bildirgan. Xitoyning AQShdagi elchixonasi bu kabi qurolning sinovi bo‘yicha ma’lumotga ega emasligini ma’lum qilgan.
Avvalroq Pentagon Xitoy 2027-yilga qadar qurollanishga 700 ta yadro kallagini yetkazib berishni, 2030-yilga borib esa ularning sonini mingga yetkazishni rejalashtirayotgani, AQSh beton obyektlarni yo‘q qiladigan yangi aviabombani sinovdan muvaffaqiyatli o‘tkazgani to‘g‘risida xabar berilgandi.
Izoh (0)