19-sentabr kuni bo‘lib o‘tgan Rossiya Davlat dumasiga saylovlarda “Yagona Rossiya” (“Yedinaya Rossiya”) partiyasi ovozlarning 49,82 foizini to‘plab, yetakchi bo‘ldi. Bu haqda “RBK” Markaziy saylov komissiyasi byulletenlarning 100 foizini hisoblab chiqqanidan keyin taqdim etgan ma’lumotlarga tayanib xabar bermoqda.
Yana to‘rtta partiya — Rossiya Federatsiyasi Kommunistik partiyasi (KPRF), Liberal-demokratik partiya (LDPR), “Adolatli Rossiya — haqiqat tomonida” (“Spravedlivaya Rossiya — za pravdu”) va “Yangi odamlar” (“Noviye lyudi”) Davlat dumasiga kirish uchun zarur bo‘lgan besh foizlik to‘siqdan o‘tdi.
Protokollarning 100 foizi hisoblab chiqilganidan keyin saylovning dastlabki natijalari quyidagicha:
- “Yagona Rossiya” — ovozlarning 49,82 foizini to‘pladi, bir mandatli okruglar bo‘yicha 198 ta mandatga ega bo‘ldi;
- Kommunistik partiya — 18,93 foiz, 9 ta mandat;
- Liberal-demokratik partiya — 7,55 foiz, 2 ta mandat;
- “Adolatli Rossiya — haqiqat tomonida” — 7,55 foiz, 8 ta mandat;
- “Yangi odamlar” — 5,32 foiz, bir mandatlilarsiz.
17—19-sentabr kunlari Davlat dumasi deputatlaridan tashqari, mahalliy parlamentlar, hukumatning munitsipal organlari a’zolari va bir nechta hududlar (regionlar) rahbarlari ham saylandi. 9 ta hududdan 6 tasida “Yagona Rossiya” vakillari g‘olib bo‘ldi, bular: Ramzan Qodirov — Chechenistonda (99,7 foiz ovoz bilan), Vladislav Xovalig — Tivada (72,4 foiz), Vyacheslav Gladkov — Belgorod viloyatida (78,79 foiz), Artyom Zdunov — Mordoviyada (78,26 foiz), Oleg Melnichenko — Penza viloyatida (72,38 foiz) va Igor Rudenko — Tver viloyatida (52,33 foiz). Tula viloyatidagi saylovlarda mustaqil nomzod Aleksey Dyumin (83,58 foiz), Ulyanov viloyatida — Kommunstik partiyadan nomzod Aleksey Russkix (83,16 foiz), Xabarovsk o‘lkasida — Liberal-demokratik partiyadan nomzod (56,77 foiz) saylovlarda g‘olib bo‘ldi.
Rossiyadagi saylovlarning borishini Yevroittifoq, Buyuk Britaniya va AQSh tanqid qildi. Xususan, Yevroittifoq vakili Jozep Borrel Rossiyada saylovchilarga o‘z huquqlarini amalga oshirish imkoniyati berilmaganini qayd etdi. Uning ta’kidlashicha, saylovlar arafasida muxolifatchi siyosatchilar, fuqarolik jamiyati tashkilotlari, mustaqil OAVlar hamda jurnalistlarga qarshi bosim kuchaygan. Buyuk Britaniya Tashqi ishlar vazirligi Rossiya saylovlarni monitoring qilish jarayoniga nisbatan kiritgan asossiz cheklovlardan hafsalasi pir bo‘lganini bildirdi. AQSh Davlat departamenti saylovlarda xalqaro majburiyatlarga amal qilinmaganini ta’kidladi.
Izoh (0)