Shimoliy Koreya yadroviy bombalar uchun foydalaniladigan uranni boyitish zavodini kengaytirmoqda. Bu haqda sun’iy yo‘ldosh tasvirlari va mutaxassislarning hisobotiga asoslanib, “Korrespondent.net” xabar berdi.
Ekspertlarning taxminicha, Pxenyan Yonbenda qurol uchun foydalaniladigan uranni ishlab chiqarishni 25 foizga oshirmoqchi. 1-sentabr kuni olingan sun’iy yo‘ldosh tasviri shuni ko‘rsatdiki, zavod hududida daraxtlar kesilib, qurilish maydonchasi tayyorlangan.
14-sentabrdagi ikkinchi fotosuratda poydevor qurish ishlarini ko‘rish mumkin. Bo‘lajak binolarning maydoni, taxminan, bir necha ming kvadrat metrni tashkil etadi. Bu esa mutaxassislarning fikriga ko‘ra, uranni boyitadigan minglab yangi sentrifugalarni joylashtirish uchun yetarli.
Avvalroq Xalqaro atom energiyasi agentligi Shimoliy Koreya Yonbenda qurol darajasidagi plutoniyni ishlab chiqaradigan yadroviy reaktorni qayta ishga tushirgani haqida xabar bergandi. Reaktor 2018-yilning dekabr oyida, Kim Chen In va Donald Trampning birinchi uchrashuvidan olti oy o‘tgach yopib qo‘yilgandi.
O‘tgan hafta Shimoliy Koreyada Kim Chen In ishtirokidagi harbiy parad o‘tkazildi. Tadbirning ekspertlar va jurnalistlar e’tiborini tortgan o‘ziga xos xususiyatlaridan biri unda ballistik raketalarning yo‘qligi bo‘ldi. Shu tariqa Pxenyan go‘yoki tinchlikni istashi haqida signal berdi.
Ammo keyingi o‘zgarishlar Pxenyanning Vashington va uning Hind-Tinch okeani mintaqasidagi ittifoqchilarini hayratda qoldiradigan kutilmagan qadamlarga tayyorligini tasdiqladi: KXDR o‘zi ishlab chiqargan yangi raketalarini sinovdan o‘tkazdi.
Izoh (0)