Afg‘oniston poytaxti Kobuldagi xalqaro aeroport 20-sentabr kuni ichki va xalqaro reyslar uchun rasman ochildi. Bu haqda Afg‘oniston Islom Amirligi mamlakatining Twitter’dagi sahifasida e’lon qilingan bayonotga tayanib, “TASS” xabar berdi.
“Kobul xalqaro aeroporti ichki va xalqaro tijorat reyslari uchun rasman ochildi. Afg‘oniston fuqaro aviatsiyasi ma’muriyatining qaroriga ko‘ra, havo porti soat 06:00 dan 18:00 gacha ishlaydi”, — deyiladi xabarda.
Qayd etilishicha, aviatsiya ma’muriyati Birlashgan Arab Amirliklari, Tojikiston, O‘zbekiston va boshqa davlatlardan Kobulga parvozlarni qayta tiklashni so‘ragan, ammo hozircha faqat Pokiston va Eron havo reyslariga rozilik bergan.
Afg‘onistonda fuqarolik reyslari uchun havo qatnovi 15-avgustda “Tolibon” jangarilari Kobulga jangsiz kirganidan keyin to‘xtatilgandi. Shundan so‘ng bir vaqtning o‘zida bir nechta davlatlar 31-avgustga qadar o‘z fuqarolari va ular bilan hamkorlik qilgan afg‘onlarni zudlik bilan evakuatsiya qildi.
Kobul aeroportining uchish-qo‘nish yo‘lagi va terminallari evakuatsiya chog‘idagi tartibsizliklar hamda 26-avgustda aeroport yaqinida sodir etilgan teraktdan jiddiy shikastlangan. Qayd etilishicha, aeroport 20 million dollar miqdorida zarar ko‘rgan. Avgust oyining oxiridan buyon Qatar va Turkiya texnik xodimlari aeroportni ishga tushirishga yordam bermoqda. 4-sentabr kuni Kobuldan birinchi samolyotlar Afg‘onistonning Mozori-Sharif, Qandahor va Hirot shaharlariga uchdi. 9-sentabr kuni AQSh Qurolli kuchlari Afg‘onistondan chiqarilgandan buyon birinchi samolyot Kobuldan Dohaga xalqaro reysni amalga oshirdi. O‘tgan hafta Eron va Pokistondan Kobulga birinchi tijorat charter reyslari uchdi.
Izoh (0)