Turkiya prezidenti Rajab Toyyib Erdo‘g‘on AQShdagi musulmonlar jamiyati vakillarini qabul qildi. Qabul Nyu-Yorkdagi Manxetten markazida (The Manhattan Center) yopiq tarzda o‘tkazildi, deb yozadi Anadolu Agency.
Turkiya prezidenti Rajab Toyyib Erdo‘g‘on Birlashgan Millatlar Tashkiloti Bosh Assambleyasining 76-sessiyasida ishtirok etish uchun 19—22-sentabr kunlari AQShda bo‘lib turadi. 20-sentabr, dushanba kuni Erdo‘g‘on Nyu-Yorkdagi Turk uyining ochilish marosimida ishtirok etdi.
Turkiya davlati rahbari 21-sentabr kuni Bosh Assambleyaning 76-sessiyasi o‘tkaziladigan birinchi kunda tadbir ishtirokchilariga murojaat qiladi. Sessiya COVID-19 pandemiyasining oldini olish, barqarorlikni tiklash, sayyoramiz ehtiyojlariga javob berish, inson huquqlarini hurmat qilish va BMTni qayta tiklash kabi mavzularga bag‘ishlanadi.
Sessiya doirasida Turkiya rahbari bir qator davlatlar rahbarlari, shuningdek, BMT bosh kotibi Antoniu Guterrish bilan ikki tomonlama uchrashuvlar o‘tkazadi.
Erdo‘g‘on Turk—Amerika milliy muvofiqlashtiruvchi qo‘mitasi tomonidan uyushtiriladigan “Dunyo adolatliroq bo‘lishi mumkin” nomli konferensiyada ishtirok etib, turk va musulmon jamoalari vakillari bilan uchrashadi va Amerika matbuotiga intervyu beradi.
Prezident Erdo‘g‘on, shuningdek, AQSh ishbilarmon dunyosi vakillari ishtirokida Turkiyaning 11-investitsiya konferensiyasining an’anaviy gala kechki ovqatida qatnashishi kutilmoqda.
Avvalroq Erdo‘g‘on o‘zining yangi kitobini AQShda dunyoning yetakchi davlatlari rahbarlariga taqdim etishi haqida xabar berilgandi. Turkiyada Erdo‘g‘onning “Dunyo adolatliroq bo‘lishi mumkin” (“Yana adil dunyo mumkun”) nomli yangi kitobi 6-sentabrdan sotuvga chiqarilgandi. Qayd etilishicha, kitobning ingliz, arab, nemis, fransuz, rus va ispan tillariga tarjima qilinishidan tushadigan mablag‘larning barchasi Turkiya Favqulodda vaziyatlar boshqarmasiga o‘tkaziladi.
Izoh (0)