Россияда сайлов натижалари эълон қилинди, Давлат думасига бешта партия кирди

19 сентябрь куни бўлиб ўтган Россия Давлат думасига сайловларда «Ягона Россия» («Единая Россия») партияси овозларнинг 49,82 фоизини тўплаб, етакчи бўлди. Бу ҳақда «РБК» Марказий сайлов комиссияси бюллетенларнинг 100 фоизини ҳисоблаб чиққанидан кейин тақдим этган маълумотларга таяниб хабар бермоқда.

Яна тўртта партия — Россия Федерацияси Коммунистик партияси (КПРФ), Либерал-демократик партия (ЛДПР), «Адолатли Россия — ҳақиқат томонида» («Справедливая Россия — за правду») ва «Янги одамлар» («Новие люди») Давлат думасига кириш учун зарур бўлган беш фоизлик тўсиқдан ўтди.

Протоколларнинг 100 фоизи ҳисоблаб чиқилганидан кейин сайловнинг дастлабки натижалари қуйидагича:

• «Ягона Россия» — овозларнинг 49,82 фоизини тўплади, бир мандатли округлар бўйича 198 та мандатга эга бўлди;
• Коммунистик партия — 18,93 фоиз, 9 та мандат;
• Либерал-демократик партия — 7,55 фоиз, 2 та мандат;
• «Адолатли Россия — ҳақиқат томонида» — 7,55 фоиз, 8 та мандат;
• «Янги одамлар» — 5,32 фоиз, бир мандатлиларсиз.

17—19 сентябрь кунлари Давлат думаси депутатларидан ташқари, маҳаллий парламентлар, ҳукуматнинг муниципал органлари аъзолари ва бир нечта ҳудудлар (регионлар) раҳбарлари ҳам сайланди. 9 та ҳудуддан 6 тасида «Ягона Россия» вакиллари ғолиб бўлди, булар: Рамзан Қодиров — Чеченистонда (99,7 фоиз овоз билан), Владислав Ховалиг — Тивада (72,4 фоиз), Вячеслав Гладков — Белгород вилоятида (78,79 фоиз), Артём Здунов — Мордовияда (78,26 фоиз), Олег Мелниченко — Пенза вилоятида (72,38 фоиз) ва Игорь Руденко — Тверь вилоятида (52,33 фоиз). Тула вилоятидаги сайловларда мустақил номзод Алексей Дюмин (83,58 фоиз), Улянов вилоятида — Коммунстик партиядан номзод Алексей Русских (83,16 фоиз), Хабаровск ўлкасида — Либерал-демократик партиядан номзод (56,77 фоиз) сайловларда ғолиб бўлди.

Россиядаги сайловларнинг боришини Евроиттифоқ, Буюк Британия ва АҚШ танқид қилди. Хусусан, Евроиттифоқ вакили Жозеп Боррел Россияда сайловчиларга ўз ҳуқуқларини амалга ошириш имконияти берилмаганини қайд этди. Унинг таъкидлашича, сайловлар арафасида мухолифатчи сиёсатчилар, фуқаролик жамияти ташкилотлари, мустақил ОАВлар ҳамда журналистларга қарши босим кучайган. Буюк Британия Ташқи ишлар вазирлиги Россия сайловларни мониторинг қилиш жараёнига нисбатан киритган асоссиз чекловлардан ҳафсаласи пир бўлганини билдирди. АҚШ Давлат департаменти сайловларда халқаро мажбуриятларга амал қилинмаганини таъкидлади.