Jahon sog‘liqni saqlash tashkiloti (JSST) Yevropa kasalliklarning oldini olish va nazorat qilish markazi (ECDC) bilan birgalikda koronavirusning delta shtammi sababli bu yozda turizmdan butunlay voz kechishga chaqirdi.
Ularning bayonotiga ko‘ra, SARS-CoV-2’ning delta varianti “Yevropani kezib yuribdi” va odatdagi shtammlarni siqib chiqarmoqda. Potensial sayyohlar infeksiyani yuqtirishning oldini olish bo‘yicha harakatlarni kuchaytirishga chaqirgan.
“2021-yil 28-iyundan 11-iyulgacha bo‘lgan davrda delta shtamm katta ustunlik ko‘rsatdi — 28 mamlakatdan 19 tasi genetik sekvenlash to‘g‘risida yetarlicha to‘liq ma’lumot bergan. Delta shtammining o‘rtacha ulushi 68,3 foizni tashkil etgan, bu esa ilgari ustuvor bo‘lgan alfa shtamm ko‘rsatkichidan 22,3 foiz yuqori”, — deyiladi JSST bayonotida.
JSST va ECDC mutaxassislari delta shtamm Yevropaning deyarli barcha mamlakatlarida qayd etilganini ta’kidladi. Shuningdek, ushbu shtamm tarqalishda davom etmoqda va boshqa variantlarni siqib chiqarmoqda.
“Biz pandemiyani tugatish nuqtayi nazaridan vaziyatni nazoratga olishdan yiroqmiz. Bundan tashqari, mintaqamizdagi ko‘plab mamlakatlarda deltaning tarqalishi bilan bog‘liq holatlar sezilarli darajada ko‘payganiga guvoh bo‘lyapmiz”, — dedi JSSTning Yevropa bo‘yicha hududiy direktori Xans Klyuge.
Shuningdek, u yozda infeksiyaning, xususan, delta shtammining tarqalish xavfini kamaytirish uchun safarga chiqish va uzoq masofalarga sayohat qilishni cheklashga chaqirdi.
“JSST mamlakatlarga bepul testlardan foydalanish imkoniyatini kengaytirishni, kishilarning virus yuqtirgani tasdiqlangan taqdirda ularni karantin va izolyatsiyaga olish choralarini kengaytirishni, virus yuqish zanjirini uzish uchun kontaktlarni kuzatishni kuchaytirishni va aholi orasidagi xavfli guruhlarni koronavirusga qarshi emlashni ta’minlashni tavsiya qiladi”, — dedi Klyuge.
Uning so‘zlariga ko‘ra, delta shtamm o‘ta yuqumli, emlanmagan odam bu shtammga duch kelganda kasal bo‘lmay qolmaydi.
ECDC direktori doktor Andrea Ammon aholini va potensial sayyohlarni “uyda o‘tirib” kurashni davom ettirishga, ya’ni “virus tarqalishining oldini olish uchun aql bilan ish qilishga” chaqirdi.
Avvalroq JSST koronavirusning yanada xavfliroq shtammi paydo bo‘lishidan ogohlantirgandi.
Izoh (0)