AQSh hukumati barcha dori-darmonlarga chidamli va o‘limga olib keluvchi zamburug‘ infeksiyasi bilan kasallanish avj olganini qayd etdi. Bu haqda AQSh kasalliklarni nazorat qilish va oldini olish markazi (CDC)ga tayanib, “RBK” xabar berdi.
Candida auris deb ataluvchi ushbu infeksiya turini davolash qiyin va u odatda o‘lim bilan yakunlanadi. Kasallik Amerikadagi qariyalar uylari va shifoxonalarda tarqalmoqda.
Ushbu kasallik immuniteti zaif bemorlarga ta’sir qiladi. Dastlab u 2009-yilda Yaponiyada aniqlangan. 2021-yil yanvaridan aprelgacha 120 dan ortiq kishida mazkur zamburug‘ infeksiyasi qayd etilgan. Biroq Candida auris kasalligiga chalinish bo‘yicha besh holatda mutaxassislar ilk bor zamburug‘ning muolajalarga chidamli variantiga duch keldi, deyiladi CDC xabarida. Texas (uchta holat) va Vashingtondagi (ikkita holat) sog‘liqni saqlash muassasalarida shunday xususiyatga ega infeksiya aniqlandi.
CDC ma’lumotlariga ko‘ra, Candida auris bilan kasallangan bemorlarning qariyb uchdan bir qismi 30 kun ichida vafot etgan. Biroq marhumlar shundoq ham og‘ir kasal bo‘lgan va ularning o‘limiga zamburug‘ sabab bo‘lganmi yoki yo‘q, noma’lum deydi mutaxassislar.
So‘nggi sakkiz yil ichida AQShda 2000 dan ortiq odam Candida auris kasalligini yuqtirgan, ularning aksariyati Nyu-York, Nyu-Jersi, Illinoys va Kaliforniyaga to‘g‘ri keladi. Qo‘zg‘atuvchining ta’siriga uchragan 5-10 foizi kishilarning qon tomirlarida yanada jiddiy infeksiyalar rivojlanadi.
Iyun oxirida Hindistonda zamburug‘ kasalligining keng tarqalgan turi mukormikoz (“qora zamburug‘”) bilan kasallanish bo‘yicha 40 845 ta holat aniqlangandi, ushbu infeksiya tufayli 3129 kishi vafot etgan.
May oyida Hindistonning Rajastan va Telangana shtatlari mukormikoz epidemiyasini e’lon qildi — zamburug‘ kasalligi birinchi navbatda koronavirus bilan og‘riganlarda qayd etilgandi.
May oxirida Hindiston shifokorlari koronavirusga chalingan bemorda zamburug‘ infeksiyasining uchinchi turi — “sariq zamburug‘”ni aniqladi. Mamlakatda “sariq zamburug‘” bilan kasallangan birinchi bemor vafot etdi.
Iyun o‘rtasida esa Hindistonda COVID-19’ga chalingan bemorda “yashil zamburug‘” aniqlandi.
Izoh (0)