Rossiyada yadro urushi yuz bergan taqdirda foydalaniladigan harbiy boshqaruv samolyotini qurish boshlandi. Samolyot Voronejda keng korpusli Il-96-400M asosida yaratilmoqda. Bu haqda mudofaa sanoati majmuasidagi manbaga tayanib “RIA Novosti” xabar berdi.
“Rossiya havo-kosmik kuchlari Il-96-400M asosida ikkita havo qo‘mondonlik punktini qabul qiladi. Ulardan biri ishlab chiqarilmoqda”, — dedi agentlik manbasi. Agentlik suhbatdoshining so‘zlariga ko‘ra, kelajakda uchinchi boshqaruv havo punktiga buyurtma berilishi mumkin. Loyiha “Zveno-3S” deb nomlangan.
Agentlikning ta’kidlashicha, yangi “Qiyomat kuni samolyoti” mavjud Il-80 samolyotining o‘rnini egallaydi, Il-80 esa Il-86 yo‘lovchi samolyoti asosida yaratilgan. Yangi IL-96-400M avvalgi versiyasiga qaraganda ikki baravar ko‘proq masofani bosib o‘tishga qodir.
Samolyot yerusti va sun’iy yo‘ldosh infratuzilmasi vayron bo‘lgan taqdirda mamlakatning oliy rahbariyatini evakuatsiya qilish va qo‘shinlarni boshqarish uchun mo‘ljallangan. Samolyotga havoda turib yonilg‘i quyish mumkin, shuningdek, parvoz paytida unga qiruvchi samolyot hamrohlik qiladi.
Samolyotning radio kompleksi qo‘shinlarga, jumladan, strategik aviatsiya, ko‘chma va shaxtali raketa uchirish qurilmalari, suvosti kemalari — strategik yadro qurollarini tashuvchilarga olti ming kilometr radiusda buyruqlarni yetkazish imkonini beradi.
Izoh (0)