Emizikli onalarni koronavirusga qarshi emlash hech qanday xavf tug‘dirmaydi, aksincha, ularning bolalarini yuqumli kasalliklardan saqlaydi. Bu haqda Jahon sog‘liqni saqlash tashkiloti (JSST) ma’lum qildi, deb yozmoqda “Kommersant”.

Foto: Sputnik

“Bir qator qisqa muddatli tadqiqotlar shuni ko‘rsatadiki, emizikli onalarni immunizatsiya qilishdan bolalar uchun hech qanday xavf yo‘q. Bundan tashqari, dastlabki dalillar vaksinadan paydo bo‘ladigan himoya onadan bolaga o‘tishi mumkinligini ko‘rsatdi”, — deyiladi tashkilotning Jeneva shtab-kvartirasidagi xabarda. Uning mutaxassislari “vaksinatsiya tufayli emizishni to‘xtatishni maslahat bermaydi”.

JSST, shuningdek, homiladorlik paytida COVID-19 ni yuqtirish xavfi yuqori ekani haqida ogohlantirdi. Ta’kidlanishicha, COVID-19 erta tug‘ruq ehtimolini oshiradi va yangi tug‘ilgan chaqaloqlar ko‘pincha intensiv davolanishga muhtoj bo‘ladi, shu sababli tashkilot homilador ayollarga vaksina olishni tavsiya qiladi.

Ayni paytda Rossiyaning “Sputnik V” vaksinasini ishlab chiqaruvchilar emizikli onalar uchun vaksinatsiyaning xavfi haqida ogohlantirgandi. “Sputnik V”dan foydalanish bo‘yicha ko‘rsatmada emizikli onalar ushbu vaksina bilan emlanishdan saqlanishi kerakligi aytilgan. Ko‘rsatmalarga muvofiq, homiladorlik paytida, vaksinaning onaga keltiradigan foydasi tug‘ilajak bola uchun ehtimoliy xavfdan yuqori bo‘lgan taqdirdagina, preparatni qo‘llash kerak.

Biroq iyul oyida Rossiya Sog‘liqni saqlash vazirligi COVID-19 ga qarshi emlash bo‘yicha ko‘rsatmalarini yangilab, unda “Sputnik V” homilador ayollar uchun hech qanday xavf tug‘dirmasligini ta’kidladi.