Pokiston Chitral viloyatining Arundu sektoriga 46 nafar Afg‘oniston hukumati harbiysining xavfsiz o‘tishini ta’minlab bergani ma’lum bo‘ldi. Bu haqda Pajhwok axborot agentligi xabar qilgan.
Qayd etilishicha, afg‘onistonlik harbiylar oqshom paytida Chitraldagi Arundu sektoriga yetib kelgan.
“Afg‘oniston hukumati bilan zarur harbiy jarayonlar bo‘yicha muloqotdan keyin orasida 5 nafar zobit ham bo‘lgan jami 46 nafar harbiy Pokiston hududiga xavfsiz o‘tib oldi. Afg‘onistonlik harbiylarga oziq-ovqat, boshpana va harbiy me’yorlarga muvofiq tibbiy yordam ko‘rsatilgan”, — deya qo‘shimcha qilgan agentlik.
Afg‘onistonlik harbiylar tegishli huquqiy jarayonlar amalga oshirilganidan keyin ortga qaytariladi.
Shuningdek, Pajhwok axborot agentligi 1-iyulda ham 35 nafar afg‘on askari Pokiston armiyasidan boshpana so‘ragani va ular ham chegara yaqinidagi postni “Tolibon” vakillariga boy berganini eslatgan. Ular ham Pokiston hududiga o‘tgan va keyinchalik xalqaro me’yorlarga muvofiq Afg‘onistonga qaytarilgan.
Afg‘oniston harbiylari, tinch aholi vakillarining boshqa qo‘shni davlatlar — O‘zbekiston va Tojikiston hududiga qochib o‘tish holatlari ham tez-tez sodir bo‘lib turibdi.
Avval Tojikiston 100 ming nafar afg‘onistonlik qochqinni qabul qilishga tayyorligi, Pokiston harbiylari Afg‘onistonning “Tolibon” egallab olgan chegara hududiga kirgani, Afg‘oniston Ichki ishlar vazirligi mamlakatdagi 31 ta viloyatda komendantlik soati e’lon qilgani haqida xabarlar berilgan.
Izoh (0)