AQSh prezidenti Jo Bayden hamda Iroq bosh vaziri Mustafo al-Kozimiy AQSh harbiy missiyasining 2021-yil oxirigacha mamlakatdan chiqib ketishi borasida o‘zaro kelishuvga erishdi. Bu haqda Associated Press xabar qilgan.
Agentlik axborotiga ko‘ra, AQSh harbiylari Iroqdagi jangovar harakatlarda ishtirok etmaydi va mahalliy askarlarni o‘rgatish hamda ularga maslahat berish bilan shug‘ullanadi.
Eslatib o‘tamiz, 2011-yilda AQSh Iroqdagi harbiylarni olib chiqib ketishni boshlagan, ammo 2014-yilda Mosulga IShID terrorchilari hujum qilganidan keyin yana Iroq hududiga qayta kiritilgandi. 2019-yilda Suriyadagi AQSh harbiylari ham Iroq hududiga o‘tkazilgan. Keyinchalik ularning Qatar yoki Kuvaytga o‘tkazilishi ma’lum qilingan.
Avval sentabr oyiga qadar AQSh harbiylarining Afg‘oniston hududidan chiqib ketishi e’lon qilingan va aprel oyidan qo‘shinning olib chiqib ketilishi boshlangandi, amerikalik harbiylardan tashqari Germaniya, Italiya, Avstraliya hamda NATO harbiylari ham mamlakatdan olib chiqib ketilgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)