Germaniya mudofaa vaziri Annegret Kramp-Karrenbauer mahalliy ARD telekanaliga bergan intervyusida Afg‘onistondagi operatsiya yakunlari bo‘yicha o‘z xulosalari bilan bo‘lishdi, deb yozadi “Kommersant”.

Germaniya mudofaa vaziri Annegret Kramp-Karrenbauer

Foto: DW

Bundesver (Germaniya Qurolli kuchlari) bo‘linmalari Afg‘onistonga 2001-yil dekabrida, AQShdagi 11-sentabr fojialaridan keyin ko‘p o‘tmay yuborilgan edi. 20 yillik operatsiyada 150 mingga yaqin germaniyalik harbiy xizmatchilar qatnashdi, ular, asosan, Hindikush hududiga joylashtirilgan edi. Harbiy missiya chog‘ida Germaniya armiyasining 59 nafar askari halok bo‘ldi.

“Biz Afg‘onistondan tezlikda yevropacha namunadagi davlatni yarata olishimiz haqida yanglish tasavvur uyg‘otdik”, — dedi vazir.

Harbiy kampaniya bo‘yicha xulosalarni keltirar ekan, Annegret Kram-Karrenbauer bo‘lg‘usi xalqaro operatsiyalarni o‘tkazish chog‘ida “realistik siyosiy maqsadlar” qo‘yish zarurligini ta’kidladi. “Bu Malida biz birinchi navbatda hisobga olishimiz kerak bo‘lgan saboqlardan biri”, — dedi u bundesverning G‘arbiy Afrikaga joylashtirilgan bo‘linmalariga ishora qilib.

Vazir, shuningdek, Germaniya NATO bo‘yicha ittifoqdoshlari bilan birgalikda islom respublikasiga bundan keyin ham yordam ko‘rsatish usullarini qidirayotganini aytdi. “Bizning mamlakatdagi harbiy ishtirokimiz yakuniga yetganidan keyin ham biz Afg‘oniston tomonida qolishimiz kerak, — dedi u. — Masalan, biz oddiy fuqarolarni qo‘llab-quvvatlashimiz mumkin”.

Annegret Kramp-Karrenbauer aytib berishicha, harbiy alyans ichkarisida hozir NATO qay yo‘l bilan Afg‘oniston armiyasini qo‘llab-quvvatlashi  haqidagi suhbatlar olib borilmoqda.

Germaniyalik askarlarning so‘nggi guruhi Afg‘onistonni 30-iyun kuni tark etdi. Germaniya mudofaa vaziri qo‘shinlarning mintaqadan olib chiqib ketilishini “muhim tarixiy voqea” deb atadi.

Eslatib o‘tamiz, Amerika va NATO mamlakatlari qo‘shinlari 29-apreldan Afg‘onistondan chiqib ketishni boshladi. Iyun oyi boshida AQSh Afg‘onistondan o‘z qo‘shinlarining uchdan bir qismini olib chiqib ketgani xabar berilgandi. Shuningdek, Afg‘onistondagi NATO missiyasi tugagandan so‘ng Turkiya harbiy kuchlari Kobul aeroporti xavfsizligini ta’minlashda yetakchi rolni egallashi haqida AQSh va Turkiya prezidentlari Jo Bayden va Rajab Toyyib Erdo‘g‘on kelishib olgan edi.

Associated Press xabariga ko‘ra, AQSh qo‘shinlarining asosiy qismini olib chiqqanidan keyin Afg‘onistonda 650 ga yaqin amerikalik harbiyni qoldirmoqchi. Ta’kidlanishicha, Afg‘onistonda qoladigan harbiylar diplomatlarning xavfsizligini ta’minlaydi.