Vatikan tarixda birinchi marta o‘z mulkiga oid ma’lumotlarni e’lon qildi, deb yozadi The Guardian. Shahar-davlat Italiya va undan tashqarida 5 mingdan ortiq ko‘chmas mulk obyektlariga egalik qiladi.
Vatikan mulki to‘g‘risidagi ma’lumotlar ikkita hujjatda — Muqaddas Taxtning 2020-yilgi konsolidatsiyalangan moliyaviy hisobotida hamda Muqaddas Taxt mulki boshqarmasining birinchi ommaviy budjeti (APSA)da keltirilgan.
APSA o‘ziga xos buxgalteriya boshqarmasi bo‘lib, u ko‘chmas mulk va investitsiyalarni boshqarish, ish haqi to‘lash, Muqaddas Taxtning xaridlar bo‘limi va kadrlar bilan ishlash bo‘limi vazifasini bajaradi.
APSA tomonidan e’lon qilingan 30 sahifalik hujjatga ko‘ra, Vatikan Italiyada 4051 ta mulkka, chet elda esa taxminan, 1120 ta mulkka egalik qiladi. Bunda Vatikanning butun dunyodagi elchixonalari hisobga olinmagan.
Shu bilan birga, Vatikanning Italiyadagi mol-mulkining atigi 14 foizigina bozor narxlarida, qolgan qismi chegirmali narxlarda ijaraga berilgan, ularning aksariyati cherkov xizmatchilariga berilgan.
Qayd etilishicha, Vatikan mulkining, taxminan, 40 foizini institutsional binolar — maktablar, monastirlar va shifoxonalar tashkil etadi. Bundan tashqari, APSA London, Jeneva, Lozanna va Parijdagi muhim joylarda investitsiya mulklariga ega.
Izoh (0)