AQSh Afg‘onistondan o‘z qo‘shinlarining uchdan bir qismini olib chiqib ketdi. Bu haqda mamlakat Markaziy qo‘mondonligi matbuot xizmatiga tayanib “RBK” xabar berdi.

Foto: Getty Images

“AQSh Markaziy qo‘mondonligi ma’lumotlariga ko‘ra, qo‘shinlarni olib chiqish jarayonining 30 foizdan 44 foizgacha bo‘lgan qismini yakunladik”, — deyiladi qo‘mondonlik bayonotida.

Markaziy qo‘mondonlikning aniqlik kiritishicha, AQSh Afg‘onistondan 300 ga yaqin yuk samolyotlarini olib chiqib ketgan, 13 ming dona jihoz utilizatsiya qilish uchun Mudofaa vazirligining moddiy-texnik ta’minlash agentligiga berilgan. Bundan tashqari, AQSh oltita obyektni rasmiy ravishda Afg‘oniston Mudofaa vazirligiga topshirgan.

Eslatib o‘tamiz, aprel oyida AQSh prezidenti Jo Bayden Afg‘onistondan Amerika qo‘shinlarini olib chiqib ketish boshlanganini e’lon qilgan edi. Uning so‘zlariga ko‘ra, harbiylar mintaqada ularning oldiga qo‘yilgan barcha maqsadlarga erishgan. Qurolli Kuchlar 11-sentabrgacha to‘liq chiqarib ketilishi rejalashtirilgan. Amerika va NATO mamlakatlari qo‘shinlari 29-apreldan chiqib ketishni boshlagan.

Oq uy Amerika prezidentining ma’muriyati Tinch okeani yo‘nalishiga e’tiborni jamlashni rejalashtirayotganini aytdi. Ayni vaqtda AQSh davlat kotibi Entoni Blinken Afg‘onistondan qo‘shinlar chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmadi.