Tojikiston parlamentining yuqori palatasi rahbari Rustami Emomali va Rossiya Davlat dumasi spikeri Vyacheslav Volodin Dushanbeda Afg‘onistondagi vaziyatni muhokama qildi hamda mudofaa va xavfsizlik sohasidagi ikki tomonlama hamkorlikni mustahkamlashni yoqlab fikr almashdi, deb yozadi “TASS”. Uchrashuv Kollektiv xavfsizlik to‘g‘risidagi shartnoma tashkilotining Parlament assambleyasi kengashi navbatdagi majlisi doirasida bo‘lib o‘tdi.
Ikki taraflama munosabatlardagi asosiy yo‘nalishlar sifatida tomonlar transmilliy tahdidlarga hamkorlikda qarshi turish, mintaqa va jahondagi xavfsizlik masalalarini aytib o‘tdi. “Afg‘oniston chegarasidagi beqaror va noaniq vaziyat Afg‘oniston muammolari bo‘yicha muloqotni davom ettirish, harbiy tayyorgarlikni doimiy ta’minlash hamda Rossiya bilan mudofaa, xavfsizlik va harbiy texnika sohasidagi hamkorlikni mustahkamlashni talab etadi”, — deyiladi Tojikiston parlamenti xabarida.
Uchrashuv chog‘ida tomonlar ikki davlat sherikligi fonidagi tojik-rus munosabatlarining hozirgi holati va istiqbollarini muhokama qilib, parlamentlararo aloqalarni kengaytirishga kelishib oldi. Parlamentlararo munosabatlar ikki mamlakat aloqalarining muhim tarmog‘i bo‘lib, turli sohalarda, shu jumladan, Kollektiv xavfsizlik to‘g‘risidagi shartnoma tashkilotining Parlament assambleyasida ham amalga oshirilayotgani qayd etildi.
Volodin Dushanbega 1-iyul kuni Kollektiv xavfsizlik to‘g‘risidagi shartnoma tashkilotining Parlament assambleyasi kengashining o‘z raisligidagi majlisida ishtirok etish uchun bordi. Ishtirokchilar kengash kun tartibiga kiritilgan 2021—2025-yillarda Kollektiv xavfsizlik to‘g‘risidagi shartnoma tashkilotiga a’zo mamlakatlarning milliy qonunchiligini uyg‘unlashtirish masalalarini hamda Afg‘onistondagi vaziyatni muhokama qildi.
Avvalroq “Tolibon” Afg‘onistonning Tojikiston bilan chegaradagi hududini egallab olgani hamda tojik-afg‘on chegarasidagi vaziyat keskin deb baholanayotgani haqida xabar berilgandi. Keyinroq Afg‘onistonda hukumat qo‘shinlari “Tolibon” jangarilarini mamlakat shimolidagi bir nechta tumanlardan siqib chiqargani ma’lum bo‘ldi. AQSh davlat kotibi Entoni Blinken Afg‘onistondan AQSh qo‘shinlari chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmagandi.
Eslatib o‘tamiz, Amerika va NATO mamlakatlari qo‘shinlari 29-apreldan Afg‘onistondan chiqib ketishni boshladi. Iyun oyi boshida AQSh Afg‘onistondan o‘z qo‘shinlarining uchdan bir qismini olib chiqib ketgani xabar berilgandi. Shuningdek, Afg‘onistondagi NATO missiyasi tugagandan so‘ng Turkiya harbiy kuchlari Kobul aeroporti xavfsizligini ta’minlashda yetakchi rolni egallashi haqida AQSh va Turkiya prezidentlari Jo Bayden va Rajab Toyyib Erdo‘g‘on kelishib olgan edi.
Izoh (0)