AQSh Afg‘onistondan qo‘shinlari chiqarilgandan so‘ng “Tolibon”ning hokimiyat tepasiga kelishini istisno qilmadi

AQSh harbiy kontingenti Afg‘onistondan chiqarilgandan so‘ng, Qo‘shma Shtatlar har qanday voqealar rivojiga tayyor turishi kerak. Bu haqda AQSh davlat kotibi Entoni Blinken CBS telekanaliga bergan intervyusida aytib o‘tdi.

Blinken qo‘shinlar chiqib ketgandan so‘ng, AQSh tomonidan qo‘llab-quvvatlanayotgan hukumat qulashi va uning o‘rnini “Tolibon” egallashi bilan bog‘liq eng yomon ssenariyga Vashington tayyormi, degan savolga shunday javob berdi: “Biz har qanday ssenariyga va ularning butun spektriga tayyor bo‘lishimiz kerak. Siz aytayotgan holatga tabiiy qaraymiz”, — deb javob berdi Blinken.

Davlat departamenti rahbari Amerika qo‘shinlari 20 yil mobaynida Afg‘onistonda bo‘lganini eslatib o‘tdi. “Ba’zan biz avvalo nima maqsadda u yerga borganimizni unutib qo‘yamiz. Qo‘shinlar 11-sentabrda bizga hujum qilgan odamlarga qarshi choralar ko‘rish uchun yuborilgan edi. Vazifamizni bajardik”, — dedi u.

Shu bilan birga, Blinken qo‘shinlarni olib chiqib ketish AQSh Afg‘onistonni butunlay tark etishini anglatmasligini aytdi. Davlat kotibi u yerda Amerika elchixonasi qolishini ta’kidladi. “Iqtisodiyot, taraqqiyot va gumanitar masalalarda qo‘llab-quvvatlashga kelganda Afg‘onistonga ko‘rsatadigan yordamimiz o‘z o‘rnida qolaveradi”, — deya xulosa qildi u.

Avvalroq Entoni Blinken CNN nashriga bergan intervyusida hech kim Afg‘onistonda fuqarolar urushining qayta boshlanishidan manfaatdor emasligi, biroq ushbu ssenariyning ehtimoli mavjudligi haqida gapirgan edi.

Eslatib o‘tamiz, Amerika harbiy qo‘mondonligi 29-aprel kuni AQSh qo‘shinlarini Afg‘oniston hududidan olib chiqishni boshladi. Avval Shimoliy Atlantika alyansi (NATO) shtab-kvartirasi apparatining vakili ham mazkur tashkilotning harbiylari ham Afg‘onistondan chiqib ketishni boshlaganini ma’lum qilgandi.

AQSh prezidenti Jo Baydenning administratsiyasi Afg‘oniston hududidagi harbiylarni olib chiqib ketishni 1-mayda boshlab, 11-sentabrda yakunlamoqchi. Avvalgi administratsiya ham Afg‘onistondagi harbiylarni 1-mayda olib chiqib ketishni boshlash borasida “Tolibon” bilan kelishib olgandi. Endi “Tolibon” Baydenning mazkur qarorini avvalgi kelishuv shartlarini buzish deb hisoblamoqda va bunga nisbatan javob harakatlari amalga oshirilishini bildirgan.