Afg‘onistonda hukumat qo‘shinlari “Tolibon” jangarilarini mamlakat shimolidagi bir nechta tumanlardan siqib chiqardi. Bu haqda mamlakat Mudofaa vazirligi vakili Fevad Omonga tayanib, Reporterly 23-iyun kuni xabar berdi.
Afg‘oniston xavfsizlik kuchlari mamlakat shimolida “Tolibon”ga qarshi hujumni kuchaytirmoqda. Harbiylar beshta tumanni ozod qilishga va jangarilarning qarshi hujumlarini qaytarishga muvaffaq bo‘ldi — bir kunda 200 ga yaqin jangari yo‘q qilindi, yana yuzdan ortig‘i yarador qilindi.
Bundan tashqari, hukumat qo‘shinlarining hujumiga mahalliy aholi ham kelib qo‘shildi. Afg‘oniston viloyatlarida odamlar hukumat jangchilarini qo‘llab-quvvatlash uchun o‘z-o‘zini mudofaa qilish otryadlarini tuzmoqda.
AQSh Afg‘onistondan o‘z harbiylarini olib chiqib ketmoqda, ayni paytgacha AQSh qo‘shinining yarmi mamlakatni tark etishga ulgurgan. Xavfsizlik nuqtayi nazaridan Amerika harbiylarining Afg‘onistondan chiqarilishi bo‘yicha ma’lumotlar faqat foiz ko‘rinishida taqdim etilmoqda.
Bundan avval “Tolibon” Afg‘onistonning Tojikiston bilan chegaradagi hududini egallab olgani hamda tojik-afg‘on chegarasidagi vaziyat keskin deb baholanayotgani haqida xabar berilgandi. Mavzuga doir:- Tojikiston davlat xavfsizlik qo‘mitasi: tojik-afg‘on chegarasidagi vaziyat keskin deb baholanmoqda
- “Tolibon” Afg‘onistonning Tojikiston bilan chegaradagi hududini egallab oldi
- O‘zbekistonning Afg‘oniston bilan chegarasi koronavirus sabab yopiladi
- AQSh Afg‘onistondan o‘z qo‘shinlarining uchdan bir qismini olib ketdi
