AQShning sobiq mudofaa vaziri Donald Ramsfeld 88 yoshida vafot etdi. Bu haqda uning oilasi bayonotiga tayanib, CNBC xabar berdi.

Nyu-Meksiko shtatida oila davrasida olamdan o‘tgan siyosatchi og‘ir kasal bo‘lgan. Ramsfeld ko‘p miqdordagi miyeloma — plazma hujayralaridan hosil bo‘lgan xavfli o‘sma bilan og‘rigan, deb xabar beradi The New York Times oila vakiliga asoslanib.

Donald Ramsfeld ikki marta Pentagon rahbari bo‘lib ishlagan: 1975—1977-yillarda AQShning 38-prezidenti Jerald Ford davrida hamda 2001—2006-yillarda AQShning 43-prezidenti kichik Jorj Bush ma’muriyatida.

U 2001-yil 11-sentabr teraktlaridan so‘ng AQShning Afg‘oniston va Iroqdagi harbiy operatsiyalariga mas’ul bo‘lgan. O‘shanda terrorchilar to‘rtta yo‘lovchi samolyotga hujum qilgan, ularning ikkitasi Manxettendagi Jahon savdo markazining shimoliy va janubiy minoralariga borib urilgan.

“Al-Qoida” terrorchilik tashkiloti hujum uchun javobgarlikni o‘z zimmasiga olgan, Amerika maxsus xizmatlari ham shu versiyaga sodiq bo‘lgan.

Hujumdan keyin prezident Bush Afg‘onistondagi “Al-Qoida” va “Tolibon” manzillarini bombardimon qilishga buyruq bergan. Shu tariqa AQShning Afg‘onistondagi harbiy kampaniyasi boshlangan.

Vashingtonning asosiy nishonlaridan biri “Al-Qoida” rahbari Usama bin Laden edi. Federal qidiruv byurosi u joylashgan joyi to‘g‘risidagi ma’lumot uchun 25 million dollar mukofot e’lon qildi. Bin Laden 2011-yilda Ramsfeld Pentagonni tark etganidan keyin o‘ldirilgan.

AQSh va ittifoqchilarning Iroqqa bostirib kirish bo‘yicha harbiy amaliyoti 2003-yil mart oyida boshlanib, may oyining boshlariga qadar davom etgan. Vashington Iroq prezidenti Saddam Husayn rejimini xalqaro terrorizm, xususan, “Al-Qoida” bilan aloqada, shuningdek, ommaviy qirg‘in qurollarini ishlab chiqarish va saqlashda aybladi. Oxir-oqibat Husayn rejimi ag‘darilib, prezidentning o‘zi qatl etildi.