Dunyodagi barcha millionerlarning umumiy boyligi 2020-yilda 7,6 foizga o‘sib, 79,6 trillion dollarni tashkil qilgan. Bu haqda Capgemini SA kompaniyasining World Wealth Report yillik hisobotiga tayanib “Interfaks” xabar berdi.
Hisobotga ko‘ra, 2020-yilda badavlat odamlar soni (high-net-worth individual, HNWI) 6,3 foizga o‘sib, 20,8 million kishiga yetdi. Boylikning o‘sishiga o‘tgan yili qimmatli qog‘ozlar bozoridagi sezilarli tiklanish turtki bo‘ldi.
Osiyo-Tinch okeani mintaqasi besh yil davomida ikkala ko‘rsatkich bo‘yicha yetakchi bo‘lib kelayotgandi, 2020-yilda esa Shimoliy Amerika yana birinchilikka chiqib oldi. Amerikada HNWI’lar soni 10,7 foizga o‘sib, 7 million kishiga yetdi, ularning umumiy kapitali esa 11,9 foizga o‘sib, 24,3 trillion dollarni tashkil qildi. O‘z navbatida Osiyo-Tinch okeani mintaqasidagi o‘sish 5,8 foizni (6,9 milliongacha) va 8,4 foizni (24 trillion dollargacha) tashkil etdi.
Yevropada badavlat kishilar soni 2,8 foizga (5,4 milliongacha), Afrikada 2,7 foizga (0,2 milliongacha), Yaqin Sharqda 6,8 foizga (0,8 milliongacha) o‘sdi. Shu bilan birga, Lotin Amerikasida ularning soni 4 foizga kamaydi (0,6 milliongacha).
Yevropada HNWI’ning boyligi 4,5 foizga (17,5 trillion dollargacha), Afrikada 3,8 foizga (1,7 trillion dollargacha), Yaqin Sharqda 10,7 foizga (3,2 trillion dollargacha), Lotin Amerikasida 0,5 foizga (8,8 trillion dollargacha) o‘sdi.
Dunyo mamlakatlari orasida o‘tgan yili boy odamlar soni bo‘yicha birinchi o‘rinni AQSh (6,575 million, 11,3 foiz o‘sish) egallagan bo‘lsa, undan keyin Yaponiya (3,537 million, +6,2 foiz), Germaniya (1,535 million, +6,9 foiz) va Xitoy (1,461 million, +11 foiz) turibdi. Hisobotda aytilishicha, ushbu davlatlarda dunyodagi barcha HNWl’larning 62,9 foizi yashaydi, bu 2019-yilda 61,6 foizni va 2012-yilda 58,4 foizni tashkil etgan.
Rossiyada 2020-yilda 218 nafar millioner qayd etilgan, bir yil avval ular 215 nafar edi.
Ayni paytda Buyuk Britaniyada millionerlar soni 591 kishidan 573 nafarga, Kuvaytda 207 kishidan 205 nafarga, Braziliyada 199 kishidan 186 nafarga tushdi. Birinchi 25 talikka kiruvchi davlatlar orasida tushish faqat shu 3 davlatda kuzatildi.
2021-yilning birinchi choragida dunyodagi millionerlar boyligining 30 foizini aksiyalar, 24 foizini naqd pul va unga tenglashtirilgan narsalar, 18 foizini asosiy daromad fondlari , 15 foizini ko‘chmas mulk, 14 foizni muqobil vositalar tashkil qilgan.
World Wealth Report hisobotida 71 mamlakat ma’lumotlaridan foydalanilgan. Dunyo yalpi milliy daromadining 98 foizdan ortig‘i va jahon fond bozorlari kapitallashuvining 99 foizi ushbu davlatlarga to‘g‘ri keladi.
Izoh (0)