Тожикистон парламентининг юқори палатаси раҳбари Рустами Эмомали ва Россия Давлат думаси спикери Вячеслав Володин Душанбеда Афғонистондаги вазиятни муҳокама қилди ҳамда мудофаа ва хавфсизлик соҳасидаги икки томонлама ҳамкорликни мустаҳкамлашни ёқлаб фикр алмашди, деб ёзади «ТАСС». Учрашув Коллектив хавфсизлик тўғрисидаги шартнома ташкилотининг Парламент ассамблеяси кенгаши навбатдаги мажлиси доирасида бўлиб ўтди.
Икки тарафлама муносабатлардаги асосий йўналишлар сифатида томонлар трансмиллий таҳдидларга ҳамкорликда қарши туриш, минтақа ва жаҳондаги хавфсизлик масалаларини айтиб ўтди. «Афғонистон чегарасидаги беқарор ва ноаниқ вазият Афғонистон муаммолари бўйича мулоқотни давом эттириш, ҳарбий тайёргарликни доимий таъминлаш ҳамда Россия билан мудофаа, хавфсизлик ва ҳарбий техника соҳасидаги ҳамкорликни мустаҳкамлашни талаб этади», — дейилади Тожикистон парламенти хабарида.
Учрашув чоғида томонлар икки давлат шериклиги фонидаги тожик-рус муносабатларининг ҳозирги ҳолати ва истиқболларини муҳокама қилиб, парламентлараро алоқаларни кенгайтиришга келишиб олди. Парламентлараро муносабатлар икки мамлакат алоқаларининг муҳим тармоғи бўлиб, турли соҳаларда, шу жумладан, Коллектив хавфсизлик тўғрисидаги шартнома ташкилотининг Парламент ассамблеясида ҳам амалга оширилаётгани қайд этилди.
Володин Душанбега 1 июль куни Коллектив хавфсизлик тўғрисидаги шартнома ташкилотининг Парламент ассамблеяси кенгашининг ўз раислигидаги мажлисида иштирок этиш учун борди. Иштирокчилар кенгаш кун тартибига киритилган 2021—2025 йилларда Коллектив хавфсизлик тўғрисидаги шартнома ташкилотига аъзо мамлакатларнинг миллий қонунчилигини уйғунлаштириш масалаларини ҳамда Афғонистондаги вазиятни муҳокама қилди.
Аввалроқ «Толибон» Афғонистоннинг Тожикистон билан чегарадаги ҳудудини эгаллаб олгани ҳамда тожик-афғон чегарасидаги вазият кескин деб баҳоланаётгани ҳақида хабар берилганди. Кейинроқ Афғонистонда ҳукумат қўшинлари «Толибон» жангариларини мамлакат шимолидаги бир нечта туманлардан сиқиб чиқаргани маълум бўлди. АҚШ давлат котиби Энтони Блинкен Афғонистондан АҚШ қўшинлари чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмаганди.
Эслатиб ўтамиз, Америка ва НАТО мамлакатлари қўшинлари 29 апрелдан Афғонистондан чиқиб кетишни бошлади. Июнь ойи бошида АҚШ Афғонистондан ўз қўшинларининг учдан бир қисмини олиб чиқиб кетгани хабар берилганди. Шунингдек, Афғонистондаги НАТО миссияси тугагандан сўнг Туркия ҳарбий кучлари Кобул аэропорти хавфсизлигини таъминлашда етакчи ролни эгаллаши ҳақида АҚШ ва Туркия президентлари Жо Байден ва Ражаб Тоййиб Эрдўғон келишиб олган эди.
Изоҳ (0)