Qozog‘iston poytaxti Nur-Sultonda o‘pkasi 100 foiz zararlangan ayol sog‘lom qiz farzandni dunyoga keltirdi. Bu haqda shahar hokimining matbuot xizmatiga tayanib Tengrinews xabar berdi.
Ma’lumotlarga ko‘ra, tug‘ruq vaqtida Aynagul Orazbekova og‘ir ahvolda bo‘lgan. Unga koronavirus va virus natijasida kelib chiqqan og‘ir darajali ikki tomonlama pnevmoniya tashxisi qo‘yilgan. 16-mart kuni ayol 2-sonli shifoxonaga yotqizilgan. Shifokorlar onaning hayoti uchun ikki oy davomida kurash olib bordi.
“Tug‘ruqqa ruxsat berilganidan keyin bemorning ahvoli og‘irlashdi: qon saturatsiyasining pastligi, yuqori harorat sababli ayol mustaqil nafas ololmadi, intoksikatsiya sindromi davom etdi. Bir necha marta konsilium (shifokorlar kengashi) o‘tkazdik, natijada bemor ekstrakorporal membrananing oksigenatsiyasiga ulandi. 20 kun davomida oksigenatsiya va gemodiafiltratsiya o‘tkazildi”, — dedi shoshilinch kardiologiya va kardioxirurgiya markazi boshlig‘i Seyl Muxametkaliyev.
Bemorning kislorod terapiyasiga ulanganiga qaramay, undagi desaturatsiya jarayoni (tanadagi suyuqlik va to‘qimalardagi gazlar konsentratsiyasini kamaytirish jarayoni) saqlanib qoldi. Konsilium qaroriga ko‘ra bemor sun’iy nafas oldirish qurilmasiga ulandi.
“Ikki oy davomida shifokorlar va hamshiralar bemorni davoladi, nazorat qildi, parvarishladi. Va tez orada og‘ir mehnatning natijasi barchamizni quvontirdi. 50 kunlik reanimatsiyadan keyin bemor ixtisoslashtirilgan bo‘limga o‘tkazildi. Shifoxonamiz mutaxassislarining jamoaviy harakati tufayli bemorning ahvoli yaxshilandi, gemodinamikasi barqarorlashdi va eng muhimi, u mustaqil nafas olyapti”, — dedi yuqumli kasalliklar bo‘limi rahbari Gulnur Ashirbekova.
Shifoxonadan ruxsat berilgach, ayol barcha shifokorlarga, hamshiralarga, sanitar ishchilarga va shifoxonaning barcha xodimlariga minnatdorchilik bildirdi.
Ma’lmuot uchun, ayol uchinchi farzandini dunyoga keltirdi.
Ma’lumot uchun, Yaponiyada birinchi marta koronavirus infeksiyasining onadan yangi tug‘ilgan chaqaloqqa yuqish holati aniqlandi. Yaponiya pediatriya jamiyati a’zolari mamlakat bo‘yicha 1,1 ming tibbiyot muassasasidan olingan ma’lumotlarni tekshirdi. Ular 2020-yilning avgust oyi oxiriga qadar Yaponiyada COVID-19 yuqtirgan onalardan 52 nafar chaqaloq dunyoga kelganini ko‘rsatdi.
Yangi tug‘ilgan chaqaloqlardan birida koronavirusga topshirgan testi ijobiy natija berdi, lekin telekanalning xabar berishicha, uning sog‘lig‘iga hech narsa xavf solmayapti.
Shuningdek, 2020-yilning noyabr oyida Singapurda homiladorlik davrida koronavirus bilan kasallangan ayol qonida virusga qarshi antitanalari bo‘lgan chaqaloqni dunyoga keltirdi. Onaning so‘zlariga ko‘ra, shifokorlar unga o‘zining antitanalari yo‘qolganini aytgan, shifokorlar antitanalarning onadan bolaga o‘tganini taxmin qilmoqda.
AQShda ham qonida koronavirusdan himoyalovchi antitana mavjud bo‘lgan chaqaloq dunyoga kelgani haqida xabar berilgandi.
Izoh (0)