Onlayn shaklda bo‘lib o‘tayotgan 2021-yilgi Jahon vaksinasi kongressi mutaxassislari koronavirusga qarshi eng yaxshi vaksina sifatida Amerikaning Moderna kompaniyasi preparatini tanladi. Bu haqda kongress veb-saytiga tayanib, “RBK” xabar berdi.
“Eng yaxshi COVID vaksinasi” mukofotining qisqa ro‘yxatidan Rossiyaning “Sputnik V” vaksinasi, Amerikaning Janssen va Novavax, Kanadaning Medicago, AstraZeneca ingliz-shved kompaniyasi preparati, Pfizer / BioNTech vaksinasi, Bharat Biotech hind farmatsevtika kompaniyasi vaksinasi va hayvonlar uchun Zoetis dori vositalari o‘rin oldi. Shu bilan birga, Pfizer va BioNTech kompaniyasi mahsuloti “yuqori baholandi”.
Mutaxassislar “Vaksinaning eng yaxshi yangi texnologiyasi/platformasi” yo‘nalishi bo‘yicha ham Moderna vaksinasini tanladi. Tanlov qaysi tamoyil asosida o‘tkazilganiga aniqlik kiritilmagan.
Jahon vaksinasi kongressi — preparatlarni ishlab chiqarish va tarqatish masalalari bilan shug‘ullanadigan xalqaro ekspertlar va olimlar ishtirokidagi bir qator konferensiyalar bo‘lib, o‘z faoliyatini boshlaganiga 20 yildan oshdi.
Moderna o‘z vaksinasini AQShda 2020-yilning 16-dekabrida tasdiqlatgan edi, bir necha kun o‘tib ushbu preparat Yevropa Ittifoqida ham ma’qullangan. Shuningdek, kompaniya Buyuk Britaniya, Kanada, Yaponiya, Janubiy Koreya, Shveysariya, Isroil va boshqa bir qator davlatlar bilan vaksina yetkazib berish bo‘yicha shartnoma imzolagan.
30-aprel kuni Jahon sog‘liqni saqlash tashkiloti (JSST) Moderna vaksinasini favqulodda vaziyatlarda foydalanish uchun tavsiya etilganlar ro‘yxatiga qo‘shdi. Tashkilot xabariga ko‘ra, preparat to‘g‘risidagi ma’lumotlar immunizatsiya bo‘yicha strategik maslahat guruhi (SAGE) tomonidan o‘rganilgan.
Ular preparatni 18 va undan katta yoshdagilarga qo‘llash tavsiya qilindi. SAGE ma’lumotlariga ko‘ra, vaksina samaradorligi 94,1 foizni tashkil etgan.
Ishlab chiqaruvchilar fikriga ko‘ra, Pfizer / BioNTech vaksinasining samaradorligi 90 foiz, AstraZeneca – 70 foiz, “Sputnik V” – 97 foizdan oshadi.
Izoh (0)