Singapurda dunyoga kelgan chaqaloq hozirda sog‘lom, biroq unda antitanalar qanchagacha saqlanib turishi va u kelgusida koronavirus yuqtirishdan himoyalanganmi yoki yo‘q – hozircha noma’lum. “Daryo” Naked Sciense nashrida e’lon qilingan maqolani tarjima tariqasida taqdim qiladi.
The Strait Times nashri xabar berishicha, singapurlik 31 yoshli Selin Ng-Chan ismli ayol SARS-CoV-2 koronavirusiga qarshi antitanaga ega bo‘lgan o‘g‘il chaqaloqni dunyoga keltirdi. Ng-Chan shu yilning mart oyida oilasi bilan Yevropada dam olish ta’tilida bo‘lgan vaqtda COVID-19 yuqtirib olgan edi. O‘sha paytda u homiladorlikning o‘ninchi haftasida edi. Unda kasallik yengil shaklda kechdi va ikki yarim hafta davolanganidan keyin uyiga javob berildi.
Chaqaloq noyabr oyi boshida Singapur Milliy universitet kasalxonasida (NUH) dunyoga keldi. Vrachlarning aytishiga qaraganda, chaqaloq butunlay sog‘lom. SARS-CoV-2 ga qarshi antitana unda qancha muddat saqlanib turadi va u chaqaloqni infeksiyadan yetarlicha himoya darajasi bilan ta’minlay oladimi-yo‘qmi, hozircha noma’lum: vaqt o‘tishi bilan ushbu oqsillar titri pasayishi taxmin qilinmoqda. Shuningdek, antitanalarni chaqaloq tanasiga onadan o‘tganmi yoki uni chaqaloq organizmining o‘zi mustaqil shakllantirganmi – bu ham ma’lum emas.
Buyuk Britaniya Qirollik kolleji akusher va ginekolog mutaxassislarining qayd etishicha, COVID-19’ning homiladorlik yoki tug‘ruq paytida onada bolaga o‘tishi kam uchraydigan holat bo‘lishi kerak. Shunga qaramay, pandemiya boshlanganidan beri bunday holatlar kuzatilgani haqida ham xabarlar tarqalgan edi.
Iyulda fransuz mutaxassislari ilk bora hali tug‘ilmagan chaqaloqqa ham koronavirus yuqish holati kuzatilganini xabar qilgandi. Tug‘ilganidan keyin o‘sha chaqaloqda ham miya shishi, muskul spazmlari hamda nevrologik simptomlar singari COVID-19’ning kattalar uchun xos bo‘lgan belgilari qayd etilgan edi. Mutaxassislar virus homilaga kindik orqali platsentadan o‘tganini taxmin qildi (aynan platsentada SARS-CoV-2 virusining eng yuqori konsentratsiyasi aniqlandi).
Olimlarning fikriga ko‘ra, ona qanday usulda tug‘ishidan va qanday usulda boqishidan (ko‘krak suti bilanmi yoki shishadanmi) va bola bilan bir xonada yotadimi-yo‘qmi, bulardan qat’iy nazar, o‘z bolasiga infeksiya yuqtirishi mumkin.
Bundan tashqari, COVID-19 bilan kasallangan yoki uning simptomlariga ega bo‘lgan ota-onasi bilan muloqotda bo‘lgan bolalar o‘zida og‘ir simptomlarni his qilmasdan ham infeksiyaga qarshi immun reaksiyasini hosil qila olishi mumkin. Aftidan, bolalarning immun sistemasi patogenning salbiy ta’siriga qaramay, uning organizm hujayralari ichidagi replikatsiyasiga qarshi samarador ravishda qarshi tura oladi.