Afrikaning Mali davlatida yashovchi ayol biryo‘la to‘qqizta farzand dunyoga keltirdi — besh qiz, to‘rt o‘g‘il. Chaqaloqlar va ularning onasi o‘zlarini yaxshi his qilmoqda, deb yozadi “RIA Novosti”.
Foto: “RIA Novosti”
Mali Sog‘liqni saqlash vazirligining ma’lumotlariga ko‘ra, chaqaloqlarning onasi Halima Sisse tug‘ruqdan oldin Mali poytaxti Bamakodagi kasalxonada ikki hafta yotganidan so‘ng, mart oyi oxirida mamlakat prezidenti Ba Ndauing farmoni bilan Marokashdagi kasalxonaga ko‘chirilgan.
“Sog‘liqni saqlash va ijtimoiy taraqqiyot vaziri 2021-yil 4-mayda Halima Sisse Mali va Marokashda o‘tkazilgan ultratovush tekshiruvlari asosida e’lon qilingandek yettita emas, to‘qqizta bolani kesarcha yo‘li bilan dunyoga keltirganini mamnuniyat bilan e’lon qiladi. Yangi tug‘ilgan chaqaloqlar va onaning ahvoli yaxshi”, — deydi Sog‘liqni saqlash vazirligi Facebook’dagi postida.
Mali sog‘liqni saqlash vaziri Fanta Sibi “kasbiy mahorati bilan ushbu homiladorlikning baxtli yakuniga erishilgani” tufayli har ikki mamlakat shifokorlarini tabrikladi. Ma’lum qilinishicha, chaqaloqlarning onasi 25 yoshda. Bir necha hafta ichida ular birgalikda Maliga qaytadi.
Shu bilan birga, Marokash Sog‘liqni saqlash vazirligi vakili Rashid Kudxari o‘z mamlakatining biron bir joyida bunday noyob hodisa — biryo‘la to‘qqiz farzand tug‘ilishi haqida eshitmaganini aytdi.
2020-yilning may oyida Fransiyada 30 yil ichida ilk bora olti egizak: besh qiz va bir nafar o‘g‘il bola dunyoga kelgan edi. Undan avval Polshada birinchi marta olti egizak dunyoga kelgan. Egizaklar — to‘rt qiz va ikki o‘g‘il 20-may kuni Krakov universiteti kasalxonasida tug‘ilgandi.
