Chilining Tirua munitsipalitetida olti oylik go‘dak xatolik tufayli koronavirusga qarshi vaksina bilan emlandi. Voqea chaqaloqning onasi milliy emlash dasturiga muvofiq vaksinatsiya qilish uchun olib kelgan Sog‘lom oila markazida sodir bo‘ldi. Bu haqda “Korrespondent.net” xabar berdi.

Foto: New Milford Spectrum

Tibbiyot xodimlari go‘dakni adashib Xitoyning Sinovac kompaniyasiga tegishli koronavirus vaksinasi bilan emlangan.

Xodimlarning beparvoligi ma’lum bo‘lganidan keyin go‘dak darhol shifokorlar nazoratiga olindi. Go‘dakda nojo‘ya ta’sirlar kuzatilmagan.

“Biz kun davomida nazorat ostida bo‘lgan bolaning sog‘lig‘idan juda xavotirdamiz... Jabrlanganlardan yana bir bor uzr so‘raymiz”, — dedi tibbiyot muassasasining direktori va bu hodisadan keyin surishtiruv boshlanganini qo‘shimcha qilgan.

Avvalroq AQShda qonida koronavirusdan himoyalovchi antitana mavjud bo‘lgan chaqaloq dunyoga kelgani haqida xabar berildi. Florida shtatining Boka-Raton shahri pediatrlari Pol Gilbert va Ched Rudnikning aytishicha, bolaning onasi, tibbiyot xodimi bo‘lgan ayol yanvar oyida homiladorlikning 36-haftasida Moderna vaksinasi bilan emlangan. Uch hafta o‘tib esa ayol tetik va sog‘lom qizaloqni dunyoga keltirdi.

Shuningdek, AQShning Moderna kompaniyasi o‘zining mRNA-1273 vaksinasini olti oylikdan 12 yoshgacha bo‘lgan bolalarda sinovini boshladi. Sinov jarayonida, taxminan, AQSh va Kanadadan 6750 nafar bola qatnashishi rejalashtirilgan.