Jons Hopkins universiteti ma’lumotlariga ko‘ra, dunyoda koronavirusga chalinganlar soni 155 million kishidan oshdi. Ayni paytda ular 155 250 838 kishini tashkil qilmoqda.
Yuqori beshlikdan AQSh (32,5 million), Hindiston (21 million), Braziliya (14,9 million), Fransiya (5,7 million) va Turkiya (4,9 million) o‘rin oldi. Global o‘limlar soni esa 3 243 744 taga yetdi. Eslatib o‘tamiz, 150 million kishilik marradan aprelning oxirida o‘tilgan edi.
Hindiston COVID-19 bilan kasallanganlar va uning oqibatida vafot etganlar soni bo‘yicha yangi rekordni o‘rnatdi. Mamlakatda so‘nggi bir kecha-kunduzda 412 262 kishida virus aniqlangan, 3980 kishi vafot etgan.Hindistonda COVID-19 holatlari bo‘yicha jahon rekordi birinchi marta 22-aprel kuni qayd etilgan, shundan keyin mamlakat uni bir necha marta yangilagan edi.
Hindistonda koronavirus avj olishi tufayli AQSh u yerdan amerikalik davlat xizmatchilarini chaqirib olmoqda. “5-may kuni departament asosiy personal tarkibiga kirmaydigan AQSh davlat xizmatchilarining o‘z xohishiga ko‘ra mamlakatni tark etishiga ruxsat berildi”, — deyiladi AQSh Davlat departamenti tavsiyasida.
Kanadada koronavirusga qarshi Pfizer/BioNTech vaksinasidan 12—15 yoshdagi bolalarni emlashda foydalanishga ruxsat berildi. Shu tariqa Kanada o‘smirlarni emlashga rasman ruxsat berilgan birinchi mamlakatga aylandi. 16 yoshdan oshgan voyaga yetmaganlar Kanadada 2020-yil dekabridan buyon emlanib keladi.Pfizer/BioNTech vaksinasining 2260 nafar 12—15 yoshli bolalarda olib borilgan klinik sinovlari natijalariga ko‘ra, u ikkilamchi ta’sirlar kuzatilmagan holda 100 foizlik samaradorlikni namoyon qildi.
Serbiyada 31-mayga qadar koronavirusga qarshi emlangan 16 yoshdan oshgan fuqarolarga 3 ming dinor (30 dollar) miqdorida moliyaviy yordam taqdim etiladi. Bu haqda mamlakat prezidenti Aleksandr Vuchich ma’lum qilgan.“Biz mas’uliyatni namoyon qilgan odamlarni qanday mukofotlash haqida bosh qotirdik”, — dedi u. Prezident, shu bilan birga, vaksina olmaydiganlarga nisbatan biror salbiy chora ko‘rish mumkin emasligini aytdi.
Serbiya hukumati may oxirigacha hech bo‘lmaganda 3 million kishi birinchi dozani olib bo‘lishiga va mamlakatda jamoaviy immunitet shakllanishiga umid qilmoqda.
Misrda koronavirus tarqalishi tufayli hukumat yana qat’iy lokdaun joriy qilishga majbur bo‘ldi. Lokdaun 6-maydan boshlab ikki haftaga kiritiladi, bu vaqt oralig‘ida savdo markazlari, do‘konlar, restoranlar ishlamaydi. Shuningdek, ommaviy yig‘inlar va konsertlar ham taqiq ostiga tushdi. Plyaj va bog‘lar 12—16-may kunlari yopiq bo‘ladi.Mamlakat bosh vaziri Mustafo Madbuliy niqob taqib yurish majburiyati haqida eslatdi hamda shu paytgacha niqob rejimiga rioya qilmagan 1,7 million kishi 50 Misr funti (3 dollar) jarimaga tortilganini aytib o‘tdi.
Mavzuga doir: Misrda koronavirusga qarshi emlash boshlandi
Izoh (0)