27-mart kuni Xitoydan O‘zbekistonga 1 million doza ZF-UZ-VAC2001 vaksinasi olib kelinadi. Bu haqda Innovatsion rivojlanish vazirligiga tayanib, “Podrobno” xabar berdi.
Uchinchi fazasi O‘zbekistonda sinovdan o‘tkazilayotgan vaksinani respublikaning o‘zida ham ishlab chiqarish rejalashtirilgan. Avvalroq innovatsion rivojlanish vaziri Ibrohim Abdurahmonov ZF-UZ-VAC 2001 vaksinasini tarqatish may—iyunda boshlanishini ma’lum qilgandi.
Eslatib o‘tamiz, O‘zbekistonda koronavirusga qarshi ilk vaksina sifatida Xitoyning Zhifei Longcom Biopharmaceutical Co. Ltd kompaniyasi bilan hamkorlikda ishlab chiqarilgan vaksina 1-mart kuni davlat ro‘yxatidan o‘tkazilgan. O‘zbekistonning hissasi va sa’y-harakatlarini inobatga olib, kompaniya ZF 2001 vaksinani birga yaratgan hammuallif mamlakat sifatida belgiladi. Ushbu yangi vaksinani ZF-UZ-VAC 2001 nomi bilan ishlab chiqarish va foydalanishga kelishilgan.
Vaksina koronavirusning “britancha” va “afrikacha” shtammlariga qarshi Moderna vaksinasidan olti barobarga yaxshiroq bo‘lib chiqqani ma’lum qilingan.
Xitoy kompaniyasi mazkur vaksinani hamkorlikda ishlab chiqarish uchun O‘zbekistonda faoliyat yuritayotgan bir qator farmatsevtika korxonalari faoliyatini o‘rganib, laboratoriya hamda texnik va ishlab chiqarish quvvatlarini inobatga olib, Jurabek Laboratories MChJ qo‘shma korxonasini tanlagan.
Ushbu vaksina 1-mart kuni davlat ro‘yxatidan o‘tkazilgan. Keyinroq O‘zbekiston koronavirusga qarshi 1 million doza ZF-UZ-VAC 2001 vaksinasini sotib olish bo‘yicha kelishuvga erishdi.
Avvalroq Toshkentga AstraZeneca vaksinasining 660 ming dozasi olib kelingani, mamlakatda aholini koronavirusga qarshi 1-apreldan emlash boshlanishi to‘g‘risida xabar berilgandi.
Izoh (0)